Үндэсний статистикийн хорооноос өнгөрсөн сарын нийгэм, эдийн засгийн талаар танилцууллаа.

Аймаг, нийслэлийн хөдөлмөр эрхлэлтийн байгууллагад 2019 оны эхний 8 сард ажилгүй 51.5 мянган иргэн шинээр бүртгүүлж, бүртгэлтэй байсан 13.1 мянган иргэн ажилд зуучлагдан орж, 42.1 мянган иргэн ажил идэвхтэй хайхгүй байгаа шалтгаанаар бүртгэлээс хасагдсан байна. Өмнөх оны мөн үеэс шинээр бүртгүүлсэн ажилгүй иргэд 4.1 мянган хүнээр, ажил идэвхтэй хайхгүй байгаа шалтгаанаар бүртгэлээс хасагдсан иргэд 3.3 мянган хүнээр буурч, ажилд зуучлагдан орсон иргэд 451 буюу 3.6 хувиар өссөн байна.

Бүртгэлтэй ажилгүй иргэдийн өнгөрсөн наймдугаар сарын эцэст 47.9 хувийг бүрэн дунд, 30 хувийг дипломын болон бакалаврын дээд, 7.3 хувийг техникийн болон мэргэжлийн, 5.7 хувийг суурь, 4.6 хувийг тусгай мэргэжлийн дунд, 2.2 хувийг бага, 1.2 хувийг боловсролгүй, 1.0 хувийг магистр, доктор зэрэгтэй иргэд эзэлж байна.

Улсын хэмжээнд бүртгэлтэй ажилгүй иргэдийн 386 буюу 1.8 хувь нь хөгжлийн бэрхшээлтэй иргэд байгаа бөгөөд 202 буюу 52.3 хувь нь эмэгтэйчүүд байна. Хөдөлмөр эрхлэлтийн байгууллагад 8 дугаар сард 5663 хүн шинээр бүртгүүлсэн бөгөөд ажил хайж буй шалтгаанаар нь авч үзэхэд 60.3 хувь нь ажлаас чөлөөлөгдсөн болон халагдсан иргэд байна.

Б.Лхам