Тэр буцжээ. Буцжээ ч гэж Монгол Улсын жүдогийн шигшээ багийг орхилоо. 2012 оноос жүдо бөхийн Үндэсний шигшээ багийн ахлах дасгалжуулагчийн хувиар албан тушаал хашиж асан тэрбээр нэг л өдөр ийн буцлаа, өмнөх амжилтууд нь түүнийг эргэн санахад хүргэхгүй ч ийн буцав, гэхдээ л олон нийт дасгалжуулагч, Монгол Улсын аварга гэдгээр нь эргэн дурсана, дурссаар байх ч болов уу. Тэр олон аавын хүүхдийг хурцалж, ирлэж, сэтгэлзүйн дайралт бүрээс “хамгаалж” иржээ. Тэгж л дэлхийн аваргаас бид медалийн өнгөө хувиргаж, бас ч гэж хос медальтан болжээ. Гагцхүү аварга нь “Ажлаа өгөх цаг боллоо” хэмээгээд даруухан буцлаа. Улсын аварга О.Балжинням тэргүүтэй удирдлагууд “Токио-2019” ДАШТ-д хүссэн амжилтаа гаргаагүйтэй холбогдуулж бүгдээрээ огцрохоо мэдэгдэж, бусдын өмнө бөхийлөө. Тэднийг бөхийлгөх шалтгаан нь ердөө л амжилт байв. Тэр албан тушаал авсан шигээ, буцаагаад өглөө. Спорт гэдэг ийм л хатуу, амжилтаар нь хүнийг дүгнэдэг хөтүү салбар.

“Олимпийн өмнөх сорилго болсон уг тэмцээнд Монголын шигшээ баг нэг хүрэл медаль, тавдугаар байр, долдугаар байрт орсон амжилттай ирсэн. Үүнийг “Тамирчдаа бэлтгэл сургуулилтад хангалттай хамруулж чадаагүй. Уураг витаминжуулалтаар хангалттай хангаж чадаагүй. Бэлтгэл тактикийн барилдаанууд дээр алдаа дутагдалтай, чамлахаар байсан. Клубын багш дасгалжуулагчид бусад тамирчдыг энэ хүрээнд сайн хамруулж чадаагүй. Бэлтгэл хангагчдыг хангалттай зохион байгуулж чадаагүй. Эдгээр үндэслэлээр Монголын жүдо бөхийн холбооны удирдлага миний бие өөрийн хүсэлтээр огцрох шийдвэрийг гаргалаа” хэмээн жүдо бөхийн холбооны гүйцэтгэх захирал М.Бөхбат ярьсан нь учиртай л байх. Гол нь их спортын өмнө Монголын тамирчид “Чадаагүй” гэсэн ганцхан үгэнд ганхийж, нийтээрээ бөхийх ийн “бөхийжээ”.

Араас нь аварга О.Балжинням “Найман жилийн хугацаанд энэ багаа ахлаж ажилласан байна. Энэ хугацаанд бидний гаргасан амжилт ч өндөр. Дэлхийн аварга гурав, ДАШТ-ий мөнгөн медаль гурав, хүрэл медалийг 10 гаруй тамирчин авсан байна. Олимпоос 2 мөнгө, 1 хүрэл, Азийн наадмаас 3 алтан медаль авсан. Гэвч 2019 оны Токиогийн ДАШТ-д, олимпийн урд жил болж байгаа тэмцээнд бид нарын ажлын алдаа дутагдлаас болж нэг хүрэл медаль, нэг тав, нэг долдугаар байр гэсэн амжилт үзүүлсэн. Бүх дасгалжуулагч үүндээ дүгнэлт хийгээд дараагийн хүмүүс нь шигшээ багаа авч олимпид орог гэсэн үүднээс бүгд ажлаа өгч байгаа юм” гэжээ. Хүн бүр өөр өөрийнхөөрөө дүгнэж л байна.

Гэхдээ тэр бол Монголын төдийгүй дэлхийн энтэй тамирчин. Жүдо, Самбо бөхөөр дэлхий болон олон улсын тэмцээнүүдэд өндөр амжилт үзүүлж, тив дэлхийд нэрээ дуурсгасан олон тамирчдыг төрүүлсэн нэгэн. Ялангуяа жүдо бөхийн хөгжлийг шинэ шатанд гаргасан гэгдээр нь монголчууд гэлтгүй бөмбөрцгийн тамирчид мэднэ. Энэ амжилтыг нь үнэлж, Самбо бөхийн дэлхийн аварга, Жүдо бөхийн дэлхийн аваргын мөнгөн медальт, Жүдо бөхийн үндэсний шигшээ багийн ерөнхий дасгалжуулагч О.Балжиннямд Хөдөлмөрийн баатар цол хүртээсэн нь өнгөрсөн жил. Тэгээд ч улсын наадамд 17 удаа шөвгөрөх нь хэн бүхний чадах амжилт, ббаргийн хүнээс шаардах бяр, тэнхээ биш. Харин орхисон орон зайг нь хэн нөхөн бол...

С.Гандөл