Хар тамхи, мансууруулах бодистой холбоотой хэрэг газар авч, үүнд донтогчдын тоо ч улам бүр нэмэгдсээр байна. 

Тухайлбал, Цагдаагийн байгууллагаас ганцхан шөнийн дотор хэдхэн цагийн хугацаанд хоёрхон дүүрэгт ажиллаж, 87 иргэнд хар тамхины тест тавьж шалгахад 24 нь хар тамхи хэрэглэж, тав нь биедээ хадгалж байсан нь тогтоогдсон. Энэ нь өнөөдөр бид хар тамхи гэгч "ЦАГААН ТАХАЛ"-аас хараат болсныг илтгэж байна. Хэдхэн жилийн өмнө манай улс хар тамхи тээвэрлэгч орны тоонд бүртгэгдэж байсан бол өдгөө хар тамхи хэрэглэгч орны тоонд орох болжээ. 

Хамгийн аймшигтай нь АЮУЛЫН ХАРАНГА дэлдээд буй цагаан тахал өсвөр насны, тэр дундаа хөрөнгө мөнгөтэй айлын хүүхдүүдийг онилж байна. Тэр ч утгаараа өсвөр насны хүүхдүүд хар тамхинд донтох, хэрэглэх тохиолдол ихээр бүртгэгдэх болсон. Өнгөрөгч 2018 онд л гэхэд насанд хүрээгүй зургаан хүүхэд хар тамхины хэрэгт холбогдон шалгагдсан байна. 

Өсвөр насны хүүхдүүд хар тамхи хэрэглэх болсон нь олон шалтгаантай. Тэдний нэг нь олны танил дуучин, урлагийнхан ч энэ төрлийн хэрэгт холбогдох явдал юм.

Угтаа бол олны танил, од байна гэдэг үзэгч, сонсогчдод уран бүтээлээ хүргэхээс гадна зөв үлгэр дууриалал үзүүлэх ёстой хэмээх ёс зүйн ойлголтыг давхар агуулдаг атал, өнөө цагт харин ч эсрэгээрээ эргэж байгаа нь бидний нүднээ ил байна. Өөрсдийн амжилт, нэр хүнддээ бардан, шоу цэнгээн, хар тамхинд ихээр донтох болсон.

Тэр ч утгаараа тэд Монголын ирээдүй болсон олон мянган залуусыг хар тамхи хэрэглэхэд хамгийн гол нөлөө үзүүлсэн гэж олон нийт үздэг. Дууг нь сонсдог, шүтэн биширдэг дуучин, хамтлагийнхан хар тамхи хэрэглээд эхлэхээр тэднийг даган дуурайх болсон.

Дээрээс нь тэдгээр хүмүүс нь өнөөдрийг хүртэл огт хариуцлага хүлээгээгүй, уран бүтээл хийгээд сайн сайхан амьдраад байгаа нь хамгийн ихээр нөлөөлж байгаа юм.

Хар тамхины хэрэгт холбогдсон олны танил ЭРХМҮҮД

• Харанга хамтлагын дуучин Х.Лхагвасүрэн

-2008 онд хар тамхины хэрэгт холбогдон шүүхээс 7 жил чанга дэглэмтэй хорих ангид хорих ял шийтгэгдсэн боловч 1 жил ял эдлээд Ерөнхийлөгчийн зарлигаар суллагдсан байдаг. 

• Мотив хамтлагийн дуучин Жижгээ буюу Б.Эрдэнэбаяр

-2018 онд мансууруулах, сэтгэцэд нөлөөт бодис /хар тамхи/ хадгалсан хэрэгт шүүхээс 2 жил хорих ял шийтгэгдэж, 6 сар орчим хорих ял шийтгэгдээд шүүгчийн захирамжаар хугацаанаас өмнө тэнсэн суллагдсан. Тэрбээр, цагдаагийн байгууллагад баригдах үедээ 2 төрлийн хар тамхи хэрэглэсэн байдалтай байсан болох нь шинжээчийн дүгнэлтээр тогтоогдсон байдаг.

• Коби буюу С.Чулуунбаяр

• 

Коби буюу С.Чулуунбаатар хамгийн анх 2007 онд хар тамхины хэрэгт холбогдож 6 сар баривчлах ял шийтгэгдэж байсан. Гэтэл 2008 онд дахин хар тамхи хэрэглэсэн, хадгалсан байдалтай баривчлагдаж шүүхээс 1 жил 4 сар хорих ял шийтгэгдэж, 6 сар орчим суугаад шүүгчийн захирамжаар хугацааны өмнө тэнсэн суллагдсан. Үүний дараа 2017 онд дахин хар тамхи хадгалсан хэрэгт холбогдон шалгагдаж шүүхээс дахин 1 жил хорих ял шийтгэгдэж, 2018 оны тавдугаар сард ялын хугацаа дуусч суллагдсан. Гэвч 2018 оны долддугаар сард дахин хар тамхины төрлийн сэтгэцэд нөлөөт бодис хэрэглэсэн, өөрийн биедээ хадгалсан байдалтай баригдаж, 1 жил хорих ял шийтгэгдсэн байна.

• “Ice Top” хамтлагийн дуучин Д.Манлайжаргал

-Д.Манлайжаргал нь бусадтай бүлэглэн мансууруулах болон сэтгэцэд нөлөөт бодисыг борлуулах зорилгогүйгээр хууль бусаар хадгалсан гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 192 дугаар зүйлийн 192.1 дэх хэсэгт зааснаар шүүгдэгч Д.Манлайжаргалыг 1 жил 6 сарын хорих ялаар шийтгэгджээ.

• Дуучин Эгшиглэн буюу Т.Болортуяа

-2013 онд мансууруулах, сэтгэцэд нөлөөт бодис хадгалсан, хэрэглэсэн хүмүүстэй хамт дайчлан баривчлагдаж байсан. Тухайн үед Т.Болортуяа нь гэмт хэрэгт холбогдон шалгагдаагүй ч, хар тамхи хэрэглэсэн байдалтай байсан.

-Харин 2018 онд Хан-Уул дүүргийн нутаг дэвсгэрт Т.Болортуяа нь сэтгэцэд нөлөөт бодис хэрэглэж мансуурсан байдалтай, Кобигийн хамт баригдаж байсан. Түүнд шүүгчийн захирамжаар 30 хоног баривчлах шийтгэл оноосон.

• Улсын начин Ц.Улаанхүү

-Ц.Улаанхүү нь мансууруулах болон сэтгэцэд нөлөөлөх эм, бэлдмэл, бодисыг онц их хэмжээгээр хууль бусаар олж авч, хадгалж, борлуулах гэмт хэрэг үйлдсэн гэм буруутай болох нь тогтоогдож, Монгол Улсын Эрүүгийн хуулийн тусгай ангийн 192 дугаар зүйлийн 192.3.1 дэх  хэсэгт зааснаар 11 /арван нэг/ жил хорих ялаар шийтгүүлсэн юм.

• Дуучин Дон Диор буюу Д.Мөнхтулга​​​​​​​
• 

-2018 онд хар тамхи хэрэглэсэн, хадгалсан байдалтай баривчлагдаж, шалгагдаж шүүхээс 1 жилийн тэнсэн харгалзах ялаар шийтгэгдсэн байна.

Энэ бол олон нийтэд ил болсон хэргүүдийг нэгээхэн хэсэг. Үүний цаана ил болсон, болоогүй хэчнээн тохиодол байгааг хэн ч таашгүй юм. Тиймээс нийгэмд, хүүхэд залууст сөрөг муу үлгэр дуурайл үзүүлж, хар тамхитай холбогдсон урлагийнханд хариуцлага тооцдог байх ёстой. Хар тамхи хэрэглэж ял шийтгэл авсан дуучдыг тайзан дээр гаргахгүй, уран бүтээл хийх эрхгүй болгох хэрэгтэй юм. Нийгэм даяар хар тамхи хэрэглэсэн бол олны танил байсан ч гэсэн хэн ч биш болдог юм гэдгийг ойлгуулах нь гол юм.

http://www.zaluu.com