АН-аас "хөөгдсөн"-ийхөө дараа тусдаа нам байгуулахаа зарласан УИХ-ын гишүүн Ж.Батзандан, Л.Болд нар “Шударга Иргэдийн Нэгдсэн Эвсэл нам” байгуулж буйгаа зарлаж Улсын Дээд шүүхэд хүргүүлээд уг асуудлаа саналаа хүргүүлсэн билээ. Тэгвэл Улсын Дээд шүүхийн Иргэний хэргийн шүүх уг хүсэлтийг хүлээж авчээ. Тодруулбал, тус шүүхийн хуралдаанаар улс төрийн нэр бүхий гурван намыг шинээр бүртгэх эсэхийг хэлэлцэх товтой байсан юм. Хуралдааны эхэнд УИХ-ын гишүүн Ж.Батзандан, Л.Болд нарын байгуулсан “Шударга Иргэдийн Нэгдсэн Эвсэл нам”-ыг шинээр бүртгэх эсэхийг хэлэлцэж, улс төрийн 34 дэх намаар албан ёсоор бүртгэж авчээ. Ингэснээр УИХ-ын гишүүн Ж.Батзандан тус намын албан ёсны дарга болж байна. 

Түүнчлэн “Сошл Либерал нам”-ыг бүртгэх эсэх асуудлыг 13.00 цагаас хэлэлцсэн бөгөөд шүүхээс тус намыг бүртгэхээс татгалзжээ. Харин яг одоо “Зүй Ёс нам”-ыг шинээр бүртгэх эсэхийг хэлэлцэж байна.

Энэ сарын 19-нд нэр бүхий улс төрийн намд холбогдох асуудлыг Улсын Дээд шүүхийн Иргэний хэргийн танхимд хэлэлцэх юм байна. Тодруулбал, "Монголын төв нам"-ыг улсын бүртгэлд бүртгүүлэх тухай хүсэлт, “Ард түмний нам"-ын нэр өөрчилснийг бүртгүүлэх тухай хүсэлт болон “Ард түмний олонхийн засаглал нам”-ын даргын нэрийн өөрчлөлтийг бүртгүүлэх тухай хүсэлтийг хэлэлцэх хуралдаан зарлагджээ.

Г.Эрдэнэ