Төлбөрийн чадамжгүй үйлчлүүлэгчдээ хар тамхи авч ирэхийг санал болгодог, үйлчилгээний хөлсөө хар тамхиар авдаг байсан өмгөөлөгчийг Цагдаагийн ерөнхий газрын Хар тамхитай тэмцэх газраас саатуулсан байна.

Тодруулбал, өмгөөлөгчөөр ажиллаж байсан О нь хулгайлах гэмт хэргээр баригдах хүртлээ үйлчилгээний хөлсөө хар тамхиар авдаг байжээ. Түүнийг 2018 оны тавдугаар сарын 25-ны өдөр хар тамхины хэргээр шалгагдаж байсан үйлчлүүлэгч Тээврийн прокурорын газрын хяналтын прокурор асан Тамир болон Тагнуулын ерөнхий газарт ажиллаж байсан А нартай өөрийн машинд хар тамхи хэрэглэж байх үед нь ЦЕГ-ын хар тамхитай тэмцэх хэлтсийн эрүүгийн мөрдөгчид үйлдэл дээр нь дайчлан баривчилж байсан юм байна.  

Өмгөөлөгч О нь хар тамхиар үйлчилгээний хөлсөө авч үүнийгээ өөрөө хэрэглэсээр эцэстээ өөрөө донтогч болсон гэх мэдээлэл байна.

Ташрамд дурдахад, 2019 оны эхний найман сарын байдлаар улсын хэмжээнд хар тамхи мансууруулах бодистой холбоотой нийт 181 гэмт хэрэг гарч, 319 хүн шалгагдсан гэх мэдээллийг ЦЕГ-ын Хар тамхитай тэмцэх газраас өгч буй. Сүүлийн жилүүдэд энэ төрлийн гэмт хэргийн гаралт ихэсч байгаа бөгөөд үүнтэй зэрэгцэн хэрэг мөрдөлт, илрүүлэлт ч мөн адил өсөж байгаа юм.