Төрийн байгуулалтын байнгын хорооны өнөөдрийн хуралдаанаар намрын чуулганаар хэлэлцэх асуудлын жагсаалт, Үндсэн хуульд нэмэлт, өөрчлөлт оруулах төслийн Ард нийтийн санал асуулга явуулах төслийг хэлэлцлээ.
Хэлэлцэж байгаа асуудалтай холбогдуулан гишүүд саналаа хэлэх үеэр Ардчилсан намын зөвлөлийн дарга Д.Эрдэнэбат "Намрын чуулганаар хэлэлцэх асуудлын жагсаалтад Ардчилсан нам 23 хуулийн төсөл өгсөн ч ихэнхийг нь хасчихсан. Ингэж болохгүй" гэдгийг хэлсэн юм.
Харин УИХ-ын гишүүн Д.Лүндээжанцан "Намрын чуулган eлсын төсөв баталдагаараа онцлогтой. Дээр нь хаврын чуулган сонгуулийн жилтэй давхацна. Үндсэн хуулийн нэмэлт, өөрчлөлттэй холбоотой гурван сонгуулийн хууль ороод ирнэ. Нийслэлийн эрхзүйн байдлын тухай, Хот төлөвлөлтийн тухай зэрэг хуулиуд байна. Түүнчлэн Шүүхийн хуулиудыг оруулах шаардлагатай байна. Үндсэн хуульд нэмэлт өөрчлөлт оруулах төсөлд дагаж мөрдөх хуулийг батална гэж байгаа. Улс төрийн намын тухай хуулийг энэ намрын чуулганаар хэлэлцэж амжихгүй. Хуучин хуулиараа явна. Нийт 28 хуулийг баталж амжихгүй, багтахгүй байх. Өргөн нэвтрүүлгийн хуулийг бид 2-3 жил ярилаа. Цаашдаа Үндсэн хуульд нэмэлт өөрчлөлт оруулах журмын тухай хуулиа ч шинэчлэх шаардлага тавигдаж байна. Хамгийн гол нь ирц, менежмент сайтай хуралдаж байж энэ олон хуулийн ард гарна" гэсэн юм.
УИХ-ын намрын чуулганаар хэлэлцэх асуудлын жагсаалтад Нөхөн үржихүйн хууль болон Нийгмийн даатгалтай холбоотой хуулийн төслүүдийг нэмэх саналыг УИХ-ын гишүүн Н.Амарзаяа танилцуулсныг байнгын хорооны гишүүд дэмжсэнээр байнгын хорооны хуралдаан өндөрлөлөө.
Сэтгэгдэл (1)