УИХ-ын Эдийн засгийн байнгын хорооны хуралдаанаар “Эрдэнэт" болон “Монголросцветмет” төрийн өмчит үйлдвэрийн газарт тогтоосон онцгой дэглэмийн хугацааг сунгах тухай асуудлыг хэлэлцлээ. Засгийн газрын Хэрэг эрх газрын дарга Л.Оюун-Эрдэнэ тэргүүтэй албаныхан уг асуудлаар шийдвэр гаргаж, онц дэглэм тогтоосон нь саяхан. Тэгвэл уг шийдвэрийг зургаан сараар сунгах санал гаргасныг Байнгын хороогоор хэлэлцэж дэмжсэн юм.
Онцгой дэглэмийг сунгах шалтгааныг Хэрэг эрхлэх газрын дарга Л.Оюун-Эрдэнэ “Үйлдвэрийн үйл ажиллагаа жигдэрсэн. Гэхдээ шалгалтын актаар илэрсэн зөрчил, дутагдлыг арилгах, хууль зөрчсөн ашиг сонирхлын зөрчилтэй гэрээ хэлцэлтэй холбоотой асуудлыг шийдвэрлэхэд цаг хугацаа шаардлагатай. Холбогдох албан тушаалтнууд мөнгө угаалтын схемд оролцсон байж болзошгүй гэж үзэж байгаа. Энэ асуудал шүүхэд шилжсэн учраас тодорхой хугацаа шаардлагатай гэж үзэж байна. Тиймээс “Эрдэнэт” болон “Монголросцветмет”-д тогтоосон онцгой дэглэмийн хугацааг сунгах тухай асуудлыг хэлэлцэж шийдвэрлэж өгнө үү" гэлээ.
Тэрбээр “Онцгой дэглэм авахад хоёр долоо хоногийн хугацааг алдсан бол 100 хувь Сингапурын мэдэлд “Эрдэнэт” үйлдвэрийн 49 хувь шилжих нөхцөл үүссэн. Тиймээс үүнийг таслан зогсоохын тулд онцгой дэглэм тогтоосон. Мөнгө угаалтын схем тодорхой болсон гэж Засгийн газрын хувьд үзсэн. Үндсэндээ 402.4 сая ам.доллартай холбоотой мөнгө угаалт гэж үзэн шүүхэд шилжүүлсэн. Онцгой дэглэм тогтоосон өнгөрсөн зургаан сарын хугацаанд “Эрдэнэт” үйлдвэр 100 хувь ТӨҮГ болсон” гэдгийг сайд Л.Оюун-Эрдэнэ нэмж тодотгосон юм.
Харин "Эрдэнэт" үйлдвэрийн захирал Х.Бадамсүрэн “Үйлдвэрийн захирлаар намайг очих үед буюу 2016 оны сүүлчээр одоогийн хүчин чадлаар ажиллуулахад 40 орчим жил ажиллуулах нөөц боломжтой гэсэн тоо баримт гарсан. 2017 оны геологи хайгуулын ажлыг 2016 онтой харьцуулахад хоёр дахин нэмэгдүүлсэн. Урьдчилсан байдлаар геологи хайгуулын ажлын үр дүнг авч үзвэл үйлдвэрийг өнөөгийн хүчин чадлаар ашиглахад хамгийн багадаа 60 жил хүрэлцэх нөөцтэй. Сүүлийн хоёр жилийн хугацаанд үйлдвэрийг ашиглаж болох нөөц, баялгийг 20 жилээр нэмэгдүүлсэн” гэв.
Мөн “Тогтоолын төслийг дэмжиж байна. "Эрдэнэт" үйлдвэрт гарсан ноцтой зөрчлүүд бүрэн таслан зогсогдоогүй гэж үзэж байна. Шаардлагатай бол Засгийн газраас "Эрдэнэт" үйлдвэрийн удирдлагатай холбоотой арга хэмжээ авахгүй юм уу. Ямар эрх дархтай хүмүүс болоод дархлагдсан мэт байдаг юм бэ. Төрийн мэдэлд 100 хувь авсан гэсэн атлаа үйлдвэрийн үйл ажиллагаа нь хаалттай. "Эрдэнэт" үйлдвэрийг шалгах УИХ-аас байгуулсан ажлын хэсэг татан буугдаагүй, дүгнэлт нь ч УИХ-аар ороогүй байгаа. Үйлдвэрт үүссэн санхүүгийн зөрчил, нөхцөл байдлын талаар мэдээллээ яагаад удирдлагууд нь өгөхгүй байгаа юм бэ. Стандарт банкны өр, авлага үүссэн гурван жилээс хойш өнөөг хүртэл санхүүгийн нөхцөл байдлыг шаардсан материал яагаад өгөхгүй байгаа юм бэ. Х.Бадамсүрэн захирал та авчирсан бол одоо өг. Олон нийт мэдэх ёстой. "Эрдэнэт" үйлдвэрийг эрсдэлээс салгах ёстой. Бүх юм ул мөртэй гэдгийг сүүлийн үед улам нотолж байгаа” гэдгийг Т.Аюурсайхан гишүүн нэмж тодотголоо.
С.Сүлд
