Төрөөс авлига, албан тушаалын гэмт хэрэгтэй тэмцэхэд баримталж буй ялын бодлого, хөөн хэлэлцэх хугацаа, эрүүгийн хариуцлагын үр нөлөө, холбогдох хууль тогтоомжийн хийдэл, зөрчил болон хууль хэрэглээний нөхцөл байдлыг судалж, ял завшуулахгүй байх, хариуцлагыг чангатгах ажлын хэсгийг УИХ-ын даргын захирамжаар байгуулсан билээ. Тэгвэл өнөөдөр тус ажлын хэсгийн хуралдаан боллоо. Тодруулбал, уулзалтад УИХ дарга Г.Занданшатар, Улсын Дээд шүүхийн Ерөнхий шүүгч Х.Батсүрэн, Улсын Ерөнхий прокурор Б.Жаргалсайхан, АТГ, цагдаа зэрэг хуулийн байгууллагын төлөөлөл оролцсон юм.

Энэ үеэр УИХ-ын дарга Г.Занданшатар “Төрийн нэр барьсан авлигачин, гэмт хэрэгтнүүдтэй хатуу хариуцлага тооцох ёстой. Мэргэжлийн хяналтын болон гаалийн байцаагчид хахууль авсан нь ил боллоо. Иргэдийн бухимдлыг төрүүлсэн зүйл их байна. Цаг үе, нийгэм өөрчлөгдөж байна. Технологи хөгжихийн хэрээр гэмт хэргийиг үйлдэл дээр нь баримтжуулж, баталгаажуулж байна. Нөгөөтэйгүүр, хуулийн байгууллагын хийж байгаа ажил олон нийтийн хяналтан дор орсон. Хэчнээн баривчилгаа явуулаад ч хэрэг алга. "Цуутай хүүхэн хуримгүй" гэгчээр болж байх шиг байна. Шүүх дээр ч, хууль, хяналтын байгууллага дээр ийм асуудал олон байна. Бие биерүүгээ чихэх нь хэтэрлээ. Хууль, шүүхийн байгууллага нэг бодлоготой ажиллах хэрэгтэй. Хоорондоо сөргөөцөлдөхөө боль" гэлээ.