Монгол Улсын Засгийн газар хийсэн ажлаа танилцуулж, иргэдэд төрийн зарим үйлчилгээг нэг цэгээс үзүүлэх өдөрлөгийг энэ сарын 16-наас 27-ны өдөр Д.Сүхбаатарын талбайд зохион байгуулахаар болжээ. Тодруулбал, энэ сарын 16-ны өдөр Засгийн газрын Хэрэг эрхлэх газар, Ерөнхий сайдын Ажлын алба, Шадар сайдын Ажлын алба, Сангийн яамнаас Улаанбаатар-Дархан, Гачууртын уулзвараас Налайх-Чойрын уулзвар хүртэлх автозамын шинэчлэл, өргөтгөл, газрын тос боловсруулах үйлдвэр, Эрдэнэбүрэнгийн усан цахилгаан станц, Тавантолгой-Гашуунсухайт, Тавантолгой-Зүүнбаян чиглэлийн төмөр зам, орон сууцны “Солонго I, II хороолол төсөл”, нисэх онгоцны шинэ буудал, “Шинэ сум” төсөл, Байгалийн түүхийн музей, Төв цэвэрлэх байгууламж, цэнгэлдэх хүрээлэн зэрэг бүтээн байгуулалтын ажлын өнөөгийн явцын талаар танилцуулахаар төлөвлөжээ.
Түүнчлэн Төрийн банк үнэгүй данс, карт нээж өгч, "Гялс банк"-ны үйлчилгээ үзүүлэх бол “Үнэт цаасны төвлөрсөн хадгаламжийн төв” ХХК үнэт цаасны эзэмшил, өмчлөх эрх, бүртгэл, компаниудын ногдол ашиг, хувь тараах талаар мэдээлэл өгөх, "Монголын хөрөнгийн бирж” ХХК “Эрдэнэс Тавантолгой” ХК-ийн хувьцаа, ягаан, цэнхэр тасалбар, ногдол ашиг зэрэгтэй холбоотой мэдээлэл, зөвлөгөө өгч, иргэдийн өргөдөл, гомдлыг хүлээн авахаас гадна "Зээлийн батлан даалтын сан", "Малын индексжүүлсэн даатгал" болон төрлийн даатгал, “Хөдөө аж ахуй, хөдөөгийн хөгжил төсөл”, “Хөгжлийн хөтөч, дэд бутэц төсөл”, “Тогтвортой амьжиргаа-3 төсөл" зэрэг төслийг танилцуулна.
Өдөрлөгийн үеэр:
- 2019.9.17 Гадаад харилцааны яам
- 2019.9.18 Эрүүл мэндийн яам
- 2019.9.19 Хууль зүй, дотоод хэргийн яам
- 2019.9.20 Байгаль орчин, аялал жуулчлалын яам
- 2019.9.21 Хөдөлмөр, нийгмийн хамгааллын яам
- 2019.9.22 Зам, тээврийн хөгжлийн яам
- 2019.9.23 Барилга, хот байгуулалтын яам
- 2019.9.24 Батлан хамгаалах яам, Хүнс, хөдөө аж ахуй, хөнгөн үйлдвэрийн яам
- 2019.9.25 Уул, уурхай, хүнд үйлдвэрийн яам
- 2019.9.26 Эрчим хүчний яам
- 2019.9.27 Боловсрол, соёл, шинжлэх ухаан, спортын яамны өдөрлөг болно.
