Ерөнхий сайд У.Хүрэлсүхийг “Ард түмний хүү”, “Хурандаа У.Хүрэлсүх” хэмээн магтаж, гоё ганган харагдуулах дуртай хэсэг бүлэг хүмүүс бий. Тэр хэрээр нь Ерөнхий сайд У.Хүрэлсүх эх оронч хүүгийн дүрд чадварлаг тоглож, уул уурхайн компаниудыг хуйгаар нь хаав. Эл үйлдэл, шийдвэр эх оронч гэсэн тодотгол зүүж, зүсээ хувилгасан нинжа нарт ихэд таалагдсан бололтой алга нижигнүүлэн ташсан гэж жигтэйхэн. Таалагдах нь ч аргагүй. Харамсалтай нь, Ерөнхий сайдын эл бодлогогүй алхам эргээд улс орны эдийн засагт хэр хэмжээний дарамт шахалт учруулахыг нэгээхэн ч бодсонгүй бололтой. Наандаж л үйл ажиллагааг нь хаасан уул уурхайн компаниудын хэдэн ажилчид ажилгүй болж, хоногийн хоолноосоо салах бол гэдгээс эхлээд эрхээ хасуулсан уул уурхайн компаниуд шүүхэд хандвал Захиргааны ерөнхий хуулиар Засгийн газар шүүх дээр унана гэдгээ ер нь бодолцсон болов уу.

Угтаа бол үе үеийн Ерөнхий сайд нар кабинетдаа нэр оноох замаар үйл хэргээ үргэлжлүүлдэг бичигдээгүй дүрэм тогтоод удсан. Жишээлбэл, “шинэчлэлийн” Засгийн газар нь шинэчлэл хийх гэж, “шийдлийн” Засгийн газар шийдэл хайж, “мэргэжлийн” Засгийн газар мэргэжлийн байх гэж оролдсон байдаг. Харин энэ удаагийн Засгийн газрын тэргүүн кабинетдаа ямар ч нэр оноосонгүй. Энэ хэрээрээ гаргасан шийдвэр нь явцуу, бодлого нь тодорхойгүй байсаар ирэх сонгуулийг угтах нь.

Нэг үгээр хэлбэл, Ерөнхий сайд У.Хүрэлсүхийн Засгийн газар юу шийдэж, юуг шинэчилж, яаж мэргэжлийн байсан бэ. Яахав, уул уурхайн компаниудыг хаах замаар байгаль орчинд сөргөөр нөлөөлж буй асуудлыг шийдэх гэж, шинэчлэх гэж оролдсон бололтой юм. Харамсалтай нь, энэ үйл хэргээ хэрэгжүүлэхдээ мэргэжлийн байж чадаагүй нь түүний том алдаа байлаа. Дээр нь түүний гаргасан шийдвэр нийт монголчуудад биш харин байгаль дэлхийг утгаар нь ухаж, сэндийчдэг нинжа нарт хамгийн их таалагдав, тэд баярлав.

Ерөнхий сайд маань ингэж л нинжа нарыг баярлуулангаа эх орныхоо газар шорооны ирээдүйг тэдэнд атгуулсан эх оронч хүү. Харамсалтай нь тэрбээр эл шийдвэртээ огтхон ч харамссангүй. Дахиад ч уул уурхайн компаниудыг хаана, хавчина гэв. Хааж болно. Гэхдээ мэргэжлийн байх ёстой. 

Мэргэжлийн төвшинд шинэчлэл хийж, шийдэл хайгаагүй Засгийн газар Захиргааны ерөнхий хуулиар шүүхийн өмнө унах нь лавтай. Энэ нь ч тодорхой. Тиймдээ ч өнөөдөр Ерөнхий сайд У.Хүрэлсүх нэр бүхий хуульчдын аманд орчихоод өөдөөс нь дуугарч чадахгүй суугаа нь үнэн. Нөгөөтэйгүүр, Ерөнхий сайдын цагаа олоогүй эл хайрынх нь харгайгаар нинжа нар баялагтай байх гэсэн газар бүрээ ухаж, сэндийчэж байна. Гэсэн атал "Ард түмний хүү", Хурандаа У.Хүрэлсүх" хаана байна вэ.  

Уг нь тэрбээр эх оронч хүүгийн дүрд тоглож, сонгуулийн "ПИ АР"-аа өсгөх гэж оролдохын оронд жаахан ч гэсэн мэргэжлийн байсан бол Засгийн газар ийм балчигт унахгүй байв. Хэрэв зээ, эх оронч дүртэй нинжа нарт ийнхүү хайр зарлаагүй байсан бол олон мянган уурхайчин ажилгүй болохгүй байв. Тэр ч бүү хэл, сөхөрсөн эдийн засгийг мэргэжлийн чигч бодлогоор өөд татах боломж бүрэн байв. Тиймээс л мэргэжлийн бус Засгийн газартай Ерөнхий сайд байх хэрэгтэй ч юм уу, үгүй ч юм уу.

Г.Эрдэнэ