Авлигын эсрэг хуулийн хэрэгжилтийг бүрэн хангахад авлигын хэргийг илчилсэн иргэдийг урамшуулдаг, тэдний аюулгүй байдлыг хамгаалдаг байх ёстойг гэж хуульчид удаа дараа хэлсээр ирсэн. Тэгвэл хуулийн хүрээнд уг зохицуулалтыг хийхээр Авлигын эсрэг хуульд нэмэлт, өөрчлөлт оруулах тухай” хуулийн төслийг УИХ-ын дарга Г.Занданшатар санаачилжээ. Хуульд нэмэлт, өөрчлөлт оруулснаар авлига авсан этгээдийн мэдээллийг иргэн, аж ахуйн нэгжээс авах юм байна. Хэрвээ уг мэдээлэл нь хуульд заагдсан үндэслэлээр тогтоогдвол АТГ-т хураагдсан бэлэн мөнгө болон эд хөрөнгийн 10 хувийг Засгийн газрын тогтоолын дагуу олгож байхаар зохицуулахаар болжээ. Өөрөөр хэлбэл, урамшуулал олгохдоо улсын төсвөөс нэмэгдэл зардал гарахгүй бөгөөд улсын орлого болгон хураасан хөрөнгөөс санхүүжүүлэх аж.

Уг хуулийн төслийг батлах нь нийгэмд ихээхэн эрэлт хэрэгцээ бий гэж ажлын хэсгээс үзсэн бололтой юм. Учир нь АТГ-аас энэ төрлийн дуудлага, мэдээлэл хүлээн авдаг ч олонх нь улс төрийн болон явцуу ашиг сонирхолын хардлагаас улбаатай байх нь бий. Тэгвэл авлигад авсан хөрөнгөний 10 хувийг “шүгэл үлээгч” буюу мэдээлэл хүргүүлэгчид өгдөг хуулийн заалттай болсоноор мэдээллийн чанар сайжрахаас гадна хээл хахуулийн хэрэг багасаж, дагаад мэдээлэгчийн аюулгүй байдлыг хангах эрх зүйн орчин бүрдэх талтай гэж үзжээ.

Уг хуулийн нэмэлт, өөрчлөлтийн төслийг  УИХ-ын дарга Г.Занданшатар УИХ дахь МАН-ын бүлгийн дарга Д.Тогтохсүрэн, УИХ-ын Тамгын газрын Ерөнхий нарийн бичгийн дарга Л.Өлзийсайхан, УИХ-ын Хууль зүйн байнгын хорооны холбогдох албан тушаалтнуудад намрын чуулганаар хэлэлцүүлэн батлах бэлтгэлийг хангах үүрэг даалгавар өгсөн байна.

Энэ талаар УИХ-ын дарга Г.Занданшатар "Их хэмжээний хөрөнгө мөнгөтэй холбоотой авлигын хэргийг илчилж мэдээлэх нь мэдээлэгч этгээдэд өндөр эрсдэл учруулдаг тул “Шүгэл үлээгчийн тухай” болон гэрчийг хамгаалах тухай хууль тогтоомжийг батлах, шинэчлэх шаардлагатай гэж үзэж байна хэмээжээ.