“Засгийн газрын үйл ажиллагааны хөтөлбөрийн хэрэгжилтийг хангуулах зарим арга хэмжээний тухай” Ерөнхий сайдын 2019 оны 01 дүгээр албан даалгаврын хүрээнд Ерөнхий сайд, Шадар сайд, Сангийн яамны харьяа байгууллагуудын “Нээлттэй өдөрлөг”-ийг өчигдөр Сүхбаатарын талбайд зохион байгууллаа.

Энэ үеэр Зуух, даралтат сав, өргөх механизмыг улсын бүртгэлд хамруулах, барилга байгууламжийн ашиглалтын гэрчилгээ олгох, Япон улсаас импортолсон 2011 оноос хойш үйлдвэрлэгдсэн авто тээврийн хэрэгсэлд цацрагийн бохирдлын хэмжилтийг үнэ төлбөргүй хийх, Хүнсний чиглэлийн үйл ажиллагаа эрхлэгчдийг цахим бүртгэлд бүртгэж код олгох, Аж ахуйн нэгж байгууллагын хүсэлтээр тоног төхөөрөмжийн гэрчилгээ олгож түргэн шуурхай үйлчилгээ үзүүлсэн үр дүнтэй өдөрлөг боллоо хэмээн иргэд олон нийт талархалтай хандаж байна.

Мөн иргэд, даатгуулагчдын хөдөлмөрийн болон нийгмийн даатгалын дэвтэр, архивын лавлагаа, бусад холбогдох баримтыг үндэслэн тэдний нийт ажилласан болон нийгмийн даатгалын шимтгэл төлсөн хугацаа, төрийн алба хаасан хугацаа зэргийг тооцож өгөх, ашигт малтмалын хайгуулын ажлын тайлан, төлөвлөгөөг хянах, шахмал түлш худалдан борлуулж буй цэгүүдийн байрлал, мэдээлэл өгөх, явуулын лабораторид жимс, хүнсний ногоо, сүү, сүүн болон гурилан бүтээгдэхүүн, архи, спирт, ундаа, шүүсэнд химийн шинжилгээ хийж өгч байлаа.

Хүнсний түүхий эд, бүтээгдэхүүний зөв сонголт, чанар аюулгүй байдлын баталгаажилтын талаар мэдээлэл өгч, “Шингэрүүлсэн шатдаг хийн тоног төхөөрөмжийг аюулгүй ашиглах үзүүлэн сургалт” зохион байгуулж, иргэдэд сонирхууллаа.