Өнөөдөр Монголын төр, нийгмийн нэрт зүтгэлтэн Юмжаагийн Цэдэнбал агсны мэндэлсний 103 жилийн ойн өдөр тохиож байна.

Юмжаагийн Цэдэнбал нь Үнэн Зоригт Хан аймгийн Зоригт Хан хошуунд (өнөөгийн Увс аймгийн Давст сум) 11 хүүхэдтэй айлын тав дахь хүүхэд нь болж мэндэлжээ. Тэрбээр 1925 онд Ховд хотын бага сургуульд элсэж 1929 онд төгссөн. Мөн онд Ю.Цэдэнбал боловсролоо үргэлжлүүлэхээр Эрхүү рүү явж, Сибирийн Санхүү, Эдийн засгийн институтыг онц дүнтэй төгсөж санхүү эдийн засагчийн мэргэжил эзэмшжээ.

1939 оны гуравдугаар сараас Сангийн яамны дэд сайд, 1939 оны долдугаар сараас 1940 оны дөрөвдүгээр сар хүртэл Сангийн яамны сайдаар ажиллаж, энэ хугацаанд Монголын худалдаа аж үйлдвэрийн банкны ерөнхий хорооны даргын ажлыг хавсран гүйцэтгэжээ. 1940 оны МАХН-ын Х их хурлаар МАХН-ын Төв Хорооны Ерөнхий нарийн бичгийн дарга буюу намын даргаар сонгогдож 1984 оны наймдугаар сар хүртэл 44 жил тасралтгүй ажиллажээ. 1945-1952 онд БНМАУ-ын Ерөнхий сайдын орлогч, Улсын төлөвлөгөөний хорооны дарга, 1952-1974 онд БНМАУ-ын Ерөнхий сайд, БНМАУ-ын сайд нарын зөвлөлийн дарга, 1974-1984 онд БНМАУ-ын Ардын Их Хурлын Тэргүүлэгчдийн дарга буюу БНМАУ-ын төрийн тэргүүнээр ажилласан байна.

Энэ хугацаанд улс орноо хөгжүүлэн цэцэглүүлэх, ард түмний аж амьдралыг дээшлүүлэн соёлжуулах, тус улсын тусгаар тогтнол, батлан хамгаалах хүч чадлыг чангатган бэхжүүлж, монгол улсын нэр хүндийг өндөржүүлэхэд өөрийн ухамсарт бүхий л амьдрал, авъяас чадвар оюун билгээ зориулсан ба Төрийг хоцрогдлоос салгаж дэлхийд нэр хүндтэй орчин цагийн шинэ монгол улсыг цогцлоон байгуулах их үйл хэрэгт ард түмнээ манлайлан удирдаж, эх орноо олон улсын хамтын нийгэмлэг Нэгдсэн үндэсний байгууллагад албан ёсоор элсүүлэн тусгаар тогтнолоо дэлхийд тамгалж, их улсын хил хязгаар гадаад орчны аюулгүй байдлыг өнө мөнхөд чандлан дархалсан түүнийг гавьяаг бид мартах ёсгүй ээ.