Сүхбаатар дүүргийн Нэгдүгээр цэцэрлэгийн ахлах А, бэлтгэлийн Б бүлгийн дөрвөн хүүхэд ХӨСҮТ-д хэвтэн эмчлүүлсэн талаар бид мэдээллэсэн билээ. Тэгвэл уг асуудалтай холбогдуулан нийслэлийн Мэргэжлийн хяналтын газраас тус эмнэлэгт хяналт шалгалт хийсэн байна. Тодруулбал, цусан суулга халдварыг таслан зогсоох, сэргийлэх арга хэмжээг Халдвар судлалын үндэсний төв, Нийслэлийн Эрүүл мэндийн газартай хамтран зохион байгуулж, хяналт шалгалт явуулжээ.

НМХГ-аас хийсэн шалгалтаар тус цэцэрлэгийн нэгдүгээр байр халуун усаар хангагдаагүй, цэцэрлэгийн гал тогоонд цэвэр усны хоолойд шүүлтүүргүй, угаагуурын хэсэгт тос баригч байхгүй, бүлгийн багш, гал тогооны ажилчдын гар угаах цэгт халдваргүйжүүлэх бодис байхгүй, дотоод хяналтын журам мөрдөгддөггүй зэрэг зөрчил илэрсэн байна. Тиймээс прокурорын байгууллагад албан бичиг хүргүүлсний дагуу өвчлөл гарсан хоёр бүлгийн үйл ажиллагааг түр хугацаагаар зогсоож, голомтын халдваргүйтгэлийн арга хэмжээ авч байгаа аж.