Одоогоос 10 жилийн өмнө “Монгол Улсад суух Дипломат төлөөлөгчийн газар хоорондын хөлбөмбөгийн аварга шалгаруулах нөхөрсөг тэмцээн” анхны тоглолтоо эхлүүлж байжээ.
Голомт банк болон Гадаад Харилцааны Яам хамтран жил бүр зохион байгуулдаг энэхүү тэмцээн өнгөрөгч амралтын өдөр уламжлал ёсоор Горхи Тэрэлжийн байгалийн цогцолбор газарт байрлах “Ред Рок” Ресорт-д болсон.
10 дахь удаагаа зохион байгуулагдсан тус тэмцээнд Монгол Улсад өөрийн орныг төлөөлөн суух Элчин Сайдын Яам болон Консулын газар, Олон Улсын байгууллагуудаас бүрдсэн 16 багийн 250 тамирчид оролцон хурд хүч, авхаалж самбаагаа сорьж 500 гаруй хөгжөөн дэмжигчдийн хамтаар нэгэн спортлог өдрийг өнгөрүүллээ.
Энхийн элч, дипломат төлөөлөгчид, алба хаагчдын хамтын ажиллагааг өргөжүүлж, албан бус найз нөхөрлөлийн холбоог бэхжүүлдэг тус тэмцээн бүтэн өдрийн турш баг тамирчдын ширүүн өрсөлдөөн дунд өрнөн шилдгүүдээ тодруулсан юм.
10 жилийн турш тасралтгүй зохион байгуулагдаж ирсэн элчингүүдийн хөлбөмбөгийн аварга шалгаруулах нөхөрсөг тэмцээний 2019 оны “Алтан цом”-ын эздээр 2018 оны ялагч Японы Элчин Сайдын Яамны баг тамирчид дахин тодорсон бол дэд байрт Казакстаны ЭСЯ-ны баг тамирчид, гуравдугаар байранд БНСУ-ын ЭСЯ-ны баг тамирчид шалгарсан юм.
