Цагдаагийн Ерөнхий газрын Хар тамхитай тэмцэх газраас газраас хар тамхитай тэмцэх чиглэлээр хийгдэх томоохон ажлууд болон цаг үеийн асуудлаар өнөөдөр мэдээлэл хийлээ.
ЦЕГ-ын Хар тамхитай тэмцэх газрын дарга, хурандаа Ж.Эрдэнэболд “Энэ сарын 16-ны өдрийн байдлаар мансууруулах эм, сэтгэцэд нөлөөт бодистой холбоотой 193 хэрэгт 330 хүн холбогдон шалгагдсан. Тодруулбал, энэ төрлийн гэмт хэрэг Улаанбаатар хотын нутаг дэвсгэрт 170, хөдөө орон нутагт 23 удаа бүртгэгдсэн. Жил ирэх тусам гэмт хэрэгт холбогдох иргэдийн тоо өсөж байна. Өөрөөр хэлбэл, өнгөрсөн 2018 оны мөн үетэй харьцуулахад 32.2 хувиар өссөн бол холбогдогч нарын тоо 21.9 хувиар өссөн.
Эдгээр шалгагдсан хүмүүсийн 282 нь 19-35 насны хүмүүс бол 5.1 хувь нь 15-18 насныхан. Насанд хүрээгүй хүүхдээс 13 нь ерөнхий боловсролын дунд сургуулийн 10-12 дугаар ангийн хүүхдүүд бол мөн 13 настай хүүхэд энэ төрлийн гэмт хэрэгт холбогдсон" гэлээ.