Төрийн эрх мэдлийг хууль бусаар авах гэсэн гэх тодотголтой 60 тэрбумын бичлэг УИХ-ын 2016 оны ээлжит сонгуулийн үеэр цацагдсан билээ. Уг бичлэгийг хууль хүчний байгууллагаас шалгаад "Ийм процесс болсон нь үнэн юм байна. Гэхдээ хэрэгжүүлээгүй байна" гэдэг үндэслэлээр нэр бүхий хүмүүст эрүүгийн хэрэг үүсгээгүй юм. Гэвч хэргийг дахин шалгаад НИТХ-ын дарга, Нийслэлийн МАН-ын дарга асан Ц.Сандуй  болон А.Ганбаатар нарт хэрэг үүсгэсэн. Тэдэнд холбогдох хэргийн гэм буруугийн шүүх хурлын урьдчилан хэлэлцүүлэг энэ сарын 26-нд Баянгол дүүргийн эрүүгийн хэргийн анхан шатны шүүхэд болох гэж байна. 

Ц.Сандуй, А.Ганбаатар нарт 2002 оны Эрүүгийн хуулийн тусгай ангийн  82.1-д зааснаар яллах дүгнэлт үйлдсэн. Тодруулбал, тус зүйл ангид   82 дугаар зүйл. Төрийн эрх мэдлийг хууль бусаар авах хуйвалдаан зохион байгуулах, 82.1.Төрийн эрх мэдлийг хууль бусаар авах хуйвалдаан зохион байгуулсан бол арван зургаагаас хорин жил хүртэл хугацаагаар хорих ял шийтгэнэ гэж заасан. Харин төрийн эрх мэдлийг хууль бусаар авах хуйвалдаан зохион байгуулахад оролцсон боловч гэмт үйлдэл эхлэхээс өмнө энэ тухай төрийн зохих байгууллага, албан тушаалтанд сайн дураараа мэдэгдсэн этгээдийг эрүүгийн хариуцлагаас чөлөөлнө гэж тус зүйлийн тайлбарт заажээ.