ЦЕГ, НҮБ-ын Хүүхдийн сан, ГХУСАЗЗ, ХХМТГ, “Faro foundation Mongolia” төрийн бус байгууллага хамтран “Зөвийг түгээе” аяны талаар мэдээлэл хийлээ.
Мэдээллийн эхэнд Гэмт хэргээс урьдчилан сэргийлэх ажлыг зохицуулах зөвлөлийн ажлын албаны дарга Л.Нямгэрэл “Өнөөдрөөс “Зөвийг түгээе” аяныг албан ёсоор эхлүүлж байна. Дэлхий нийтээр цахим хэрэглээ өдрөөс өдөрт, цаг тутамд нэмэгдэж байгаа үед Монгол Улсад нийгмийн сүлжээний хэрэглээ өсч байгаа. 2018 онд цахим хэрэглэгчийн тоо 2.1 сая байсан бол 2019 оны эхний хагас жилийн байдлаар 2.2 сая болж өссөн байна. Тэр дундаа нийгмийн сүлжээний олон флатформуудаас фэйсбүүкийг 92.7 хувь нь хэрэглэж байна.
Тийм учраас нийгмийн сүлжээний идэвхтэй хэрэглээ, түүний цаана байгаа сөрөг эрсдэлээс урьдчилан сэргийлэх, мэдээллийг зөв олж авах, түүнийг ялгаж, таних талаар тоон бичиг үсэгтэн хөтөлбөрийг албан ёсоор эхлүүлж байна.
Энэ хүрээнд Фэйсбүүкийн албан ёсны эрхтэйгээр цахим хичээлийг монгол хэлээр бэлтгэн хүргэнэ. Ид, дээд сургуулийн багш нартай хамтарч хүргэх юм. Үүнээс гадна энэ удаагийн арга хэмжээ 2018 оны есдүгээр сард хийж байсан #Unfriend хөдөлгөөний хоёр дахь үе шат гэж ойлгож болно” гэлээ. Мөн Unfriend хөдөлгөөний үеэр судалгааны байгууллагаас авсан мэдээллээр давхардсан тоогоор долоо орчим сая хүн бидний бэлтгэсэн контентийг хүлээж авсан гэдгийг онцоллоо.
Харин ЦЕГ-ын Урьдчилан сэргийлэх хэлтсийн Хүүхэд гэмт хэргээс урьдчилан хэлтсийн дарга, цагдаагийн хошууч Д.Будзаан “2012 оноос нийгмийн цахим сүлжээг идэвхтэй ашиглаж ирсэн. Тэр үед цахим сүлжээтэй холбоотой 14 гэмт хэрэг бүртгэгдэж байсан. Харин 2017 оны байдлаар 299, 2018 онд 659, 2019 эхний зургаан сарын байдлаар 584 гэмт хэрэг үйлдэгдсэн байна. 50-60 дахин өссөн байна. Гэмт хэргийг хохирогч нь бага насны хүүхдүүд, эмэгтэйчүүд байна. Мөн оюуны өмчийн эсрэг гэмт хэргүүд үйлдэгдэж байна” гэлээ.
С.Сүлд