Ерөнхийлөгч Х.Баттулга Салхитын мөнгөний ордын хэрэгтэй холбогдуулан нэр бүхий 17 шүүгчийн бүрэн эрхийг түдгэлзүүлсэн билээ. Түдгэлзүүлсэн шүүгчдийг АТГ-аас шалгаж байгаа бөгөөд эхнээс нь мэдүүлэг авч эхэлсэн гэх мэдээлэл бий. Тэгвэл эдгээр шүүгчдийн найм нь уг хэрэгтэй ямар нэг байдлаар холбоотой болох нь тогтоогдсон бололтой. Шүүгч асан Ч.Бямбааг энэ хэрэгт холбогдуулан шалгаж байсан ч тэрбээр Урьдчилан хорих 461 дүгээр ангид амиа алдсан. Үүний дараа талийгаачийн хүү, шүүгч асан С.Төмөрбаатарын бүрэн эрхийг түдгэлзүүүлсэн орой Алтанбулагийн боомтоор ОХУ руу гарч амжсан байдаг. Ингээд АНУ-ын хил дээр саатуулагдаж, тэнд цагдан хоригдсон гэх мэдээлэл бий. Тэгвэл уг хэрэгт дахин нэг шүүгчийг шалгаж эхэлсэн бололтой. Тодруулбал, Дундговь аймгийн Гурвансайхан сумын нутагт байрлах Салхитын мөнгөний ордтой холбогдох хэргийн гурван шатны шүүх хурлыг шүүхдээ ашиг сонирхолын зөрчил гаргасан байж болзошгүй хэрэгт гавьяат хуульч, ШЕЗ-ийн зөвлөх Б.Сарантуяа болон түүний хүү нийслэлийн Иргэний хэргийн давж заалдах шатны шүүгч Г.Даваадорж нарыг холбогдуулан шалгаж эхэлсэн байна.