Энэ долоо хоногт өдөр Тээврийн цагдаагийн албаны Жижүүрийн шуурхай удирдлагын хэлтэс нийт 1326 дуудлага мэдээлэл хүлээн авснаас 1027 зам тээврийн ослын шинжтэй дуудлага мэдээлэл бүртгэгджээ.

Бүртгэгдсэн зам тээврийн ослын улмаас 22 хүн гэмтэж, ноцтой зам тээврийн ослын улмаас орон нутагт хоёр хүний амь нас хохирсон байна. Үүнээс долоон хүүхэд хүнд, хүндэвтэр гэмтэж бэртсэн байна.

Тухайлбал, энэ сарын 02-ны өдрийн 20.35 минутын орчимд Увс аймгийн Улаангом сумын нутаг, асфальтан замд Nissan X-trail маркийн автомашины жолооч, явган зорчигч С, Г нарын мөргөж, явган зорчигч С нас барж, Г гэмтжээ.  Мөн энэ сарын 03-ны өдрийн 09.30 минутын орчимд Дорнод аймаг Чойбалсан хотын нутаг, Toyota Crown маркийн автомашины жолооч, явган зорчигч Э-г мөргөж амь насын хохироожээ.  

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 120 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 30 хүнийг шүүхээр баривчилж хуулийн дагуу хариуцлага тооцсон байна. 

Энэ долоо хоногт бүртгэгдсэн зам тээврийн осол, хэргийг өмнөх долоо хоногийн нөхцөл байдалтай харьцуулахад нийт дуудлага мэдээлэл 3.1 хувиар, зам тээврийн ослын шинжтэй дуудлага 18.3 хувиар ихэссэн бол гэмтсэн хүний тоо 31.2 хувиар, гэмтсэн хүүхдийн тоо 22.2 хувиар, нас барсан хүний тоо 33.3 хувиар тус тус буурсан  байна.

“ДУРААРАА БИШ ЭЭ ДҮРМЭЭРЭЭ” тээврийн хэрэгслийн хөдөлгөөнд оролцохыг уриалж байна.

Тээврийн цагдаагийн алба