ЗХУ-ын гавьяат дасгалжуулагч, Якутын нэрт дасгалжуулагч агсан Дмитрий Коркиний нэрэмжит олон улсын уламжлалт тэмцээн энэ сарын 11-13-нд Якутын «Триумф» спортын ордонд зохиогдохоор боллоо. 12 дахь удаагийн уг тэмцээнд ОХУ, Монгол, Румын, Латви, Афганистан, БНХАУ, Япон, Гүрж, Польш, Литва, Филиппин, Беларусь, Унгар, Молдав, Азербайжан, Болгар, Канад, Энэтхэг, Узбекистан, Кыргызстан, Казахстан, Армен, Македон, БНСУ гэсэн 24 орны бөхчүүд барилдахаар болжээ.
Мөн “Рио-2016” олимпийн наадмын аварга, ДАШТ-ий алт, хүрэл медальт Сослан Романов, “Рио-2016” олимпийн хүрэл медальт, дэлхийн болон Европын гурван удаагийн аварга Гажи Алиев, “Лондон-2012” олимпийн наадмын мөнгө, “Бээжин-2008” олимпийн хүрэл медальт, 2010 оны дэлхийн аварга Сушил Кумар, “Баку-2015” Европын анхдугаар наадмын аварга, Иван Ярыгиний “Алтан Гранпри”-гийн хошой аварга Александр Богомоев тэргүүтэй шилдгүүд зодоглохоор мэдүүлэгээ өгөөд байна.
Тэмцээний нийт шагналын сан 100 мянган ам.доллар бөгөөд алт 5000, мөнгө 3000, хүрэл медальтан 1000 “ногоон” хүртэнэ. Түүнчлэн азтай үзэгчийг “Сүзүки” машинаар шагнах аж.
