Харилцаа холбооны зохицуулах хороо болон Фэйсбүүк компанийн хамтын ажиллагааны үр дүнд хууль бус контентын талаарх гомдол хүсэлтийг түргэн шуурхай шийдвэрлэх “ногоон суваг” буюу шууд харилцах цахим сувгийг өнөөдөр буюу энэ сарын 4-ний өдөр албан ёсоор  нээлээ. Уг “Ногоон  сувгийг” өнгөрсөн зургадугаар сард туршиж өнөөдөр ийнхүү  нээж байгаа юм. Энэ талаар Фэйсбүүк группийн Хонгконг, Тайвань, Монгол улс дахь бодлого үйл ажиллагаа хариуцсан захирал  Жорж Чэн “Монгол Улсад фэйсбүүк хэрэглэгчдийн тоо нэмэгдэх тусам хариуцлагыг улам чангаруулах ёстой гэж үзсэн. Цахим орчны аюулгүй байдлыг хангах  ногоон суваг буюу шууд суваг нь Фэйсбүүк компани болон Харилцаа холбооны зохицуулах хороо хоёрын хоорондын гүүр болох юм. Хамтын ажиллагааны хүрээнд олон нийтийн аюулгүй байдалд шууд заналхийлэл учруулж болохуйц контент болон фэйсбүүкт бүртгэлтэй хэрэглэгчдийн хувийн хаягийг устгах зэрэг олон арга хэмжээ авна. Ингэхдээ хүчирхийлэл болон гэмт хэргийн шинжтэй, олон нийтийг аюулгүй байдалд сөргөөр нөлөөлөхүйц, амиа хорлолт, хүүхдийн бэлгийн мөлжлөг, садар самуун, үзэн ядах үг хэллэг, худал мэдээлэл, спам, оюуны өмч, журамласан бараа бүтээгдэхүүнтэй холбоотой мэдээ, мэдээлэл үүнд хамаарна. Харин улс төрийн албан тушаалтныг шүүмжилж, доромжилсон зэрэг мэдээ, мэдээлэлтэй холбоотой гомдлыг ногоон сувгаар хүлээж авахгүй. Учир нь олон нийт  нь улс төрийн албан тушаалтныг шүүмжлэх, тэдгээртэй холбоотой мэдээллийг солилцох бүрэн эрхтэй” гэв. Харин Харилцаа холбооны зохицуулах хорооны дарга Г.Чинзориг  “Манай улсад хоёр сая фэйсбүүк хэрэглэгч байдгаас үүний 40 хувь нь хуурамч хаяг. Тиймээс хуурамч хаягийг хаахыг хичээж байна” гэлээ.