Нийслэл, дүүргийн цагдаагийн газар, хэлтсээс шөнийн хяналт шалгалтыг тасралтгүй явуулж билээ. Өнгөрсөн хоногийн хугацаанд Монгол Улсын хууль тогтоомжийг зөрчиж үйл ажиллагаа явуулсан дараах аж ахуйн нэгж, байгууллагуудад хуульд заасан хариуцлага ногдуулахаар ажиллаж байна.

Үүнд:
- Баянгол дүүргийн “Sea”, “Love”, “Sweat day”, Чингэлтэй дүүргийн “Tiger”, Сонгинохайрхан дүүргийн “Баян-Уул” баар, ресторан 21 насанд хүрээгүй хүнд архи, согтууруулах ундаагаар үйлчилсэн,
- Баянгол дүүргийн “Гэгээ” кароаке /хуучнаар “Тааз” төв/, Баянзүрх дүүргийн “Жулиа” төв нь хууль бусаар архи, согтууруулах ундаа худалдсан,
- Баянзүрх дүүргийн “Ди Эс” караоке, Сүхбаатар дүүргийн “New York” ресторан тусгай зөвшөөрөлгүй архи согтууруулах ундаагаар үйлчилсэн,
- Баянзүрх дүүргийн “Дэлгэрэх”, “Даймонт” зочид буудал, “BG” дэн буудал тусгай зөвшөөрөлгүй үйл ажиллагаа явуулсан,
- Сүхбаатар дүүргийн “Муливена”, “Irish” паб, “Алтан гадас” ресторан, Баянгол дүүргийн “Game arena”, “AIM”, “Battle Arena”, Сүхбаатар дүүргийн “Хэкс”, “МБ”, “Хавк арена” цахим тоглоомын газрууд цагийн хуваарь хэтрүүлсэн,
- Баянзүрх дүүргийн 18 дугаар хороо 39 дүгээр байрны өргөтгөл, Баянгол дүүргийн “Хаш чулуун” саун, “Нобел” саун, “Кровн” баар, “Боржигон” зэрэг газруудад хууль бусаар мөрийтэй тоглоом тоглуулсан,
- Баянгол дүүргийн 5, 15, Баянзүрх дүүргийн 4 дүгээр хорооны нутаг дэвсгэрт саун, массаж нэрээр биеэ үнэлсэн байж болзошгүй үйлдлийг тус тус илрүүлэн материалжуулан шалгаж байна.
Цаашид цагдаагийн байгууллагаас хяналт, шалгалтыг тасралтгүй зохион байгуулах ба зөрчил гаргасан аж ахуй нэгжийн тусгай зөвшөөрлийг цуцлуулах, үйл ажиллагааг зогсоох зэрэг саналуудыг холбогдох байгууллагад хүргүүлэх болно.
 

Иргэд та бүхэн хууль тогтоомж зөрчин үйл ажиллагаа явуулсан аж ахуйн нэгж байгууллагын талаарх мэдээ, мэдээллийг Цагдаагийн байгууллагын 102, Нийслэлийн цагдаагийн удирдах газрын 1800-1102 дугаарын утсанд өгч бидэнтэй хамтран ажиллана уу.
Мэдээллийг нууцлалыг чанд хадгална.
НИЙСЛЭЛИЙН ЦАГДААГИЙН УДИРДАХ ГАЗАР