Индонез улсын Бали аралд зохион байгуулагдсан Ой тогтоолтын Ази тивийн аварга шалгаруулах нээлттэй тэмцээн өнгөрсөн амралтын өдрүүдэд боллоо.

Тэмцээнд 13 орны 133 тамирчид авхаалж самбаагаа дайчлан өрсөлдсөн байна.

Уг тэмцээнд манай улсаас 16 тамирчин оролцсон бөгөөд 21 алт, 24 мөнгө, 22 хүрэл нийт 67 медаль хүртэж, багийн нийлбэр дүнгээр тэргүүлжээ.

Тухайлбал, бага насны ангилалд Ш.Наранбат 4361 оноо цуглуулан аваргалж, Б.Жамбалбаярням 3474 оноогоор III байр, өсвөр насны ангилалд ОУ-ын Их Мастер Э.Лхагвадулам 6993 оноогоор тэргүүлж, Их Мастер У.Солонго 6076, ОУ-ын Мастер Г.Мянганбаяр 5799 оноогоор удааллаа.

Харин насанд хүрэгчдийн ангилалд Мастер Б.Лхагвадорж 6423 оноогоор тэргүүлж, ОУ-ын Их Мастер Э.Пүрэвжав 6402 оноогоор  II байранд шалгарав.

Ингээд тэмцээний 10 төрлийн дараах нийлбэр оноогоор 2017 оны Өсвөрийн дэлхийн аварга, Ажнай корпорацийн тамирчин, ОУ-ын Их мастер Э.Лхагвадулам  тэргүүлж Ази тивийн аварга боллоо. Мөн тэрбээр тэмцээний  “Олон багц” төрөлд 978 хөзөр, “Тооны марафон” төрөлд 1612 цифр тогтоон дэлхийн рекордыг шинэчлэн тогтоосон байна.