Үндсэн хуулийн нэмэлт, өөрчлөлтийн хүрээнд парламентын 75 гишүүнийг /Д.Гантулга өөрийн хүсэлтээр өргөдлөө өгснөөс хойш/ үндсэн ажлыг нь хийлгэсээр тэр дундаа саарал ордноос уях болсоор удав. Өмнөхөөсөө ялгаатай нь, Үндсэн хуулийн нэмэлт, өөрчлөлтийн хүрээнд Ард нийтийн санал асуулга явуулах УИХ-ын 73 дугаар тогтоолд Ерөнхийлөгч Х.Баттулгын зүгээс ээлжит хоригоо тавьсан юм. УИХ-ын ээлжит сонгуулиар Монголын ард түмэн МАН-д 65 суудал буюу үнэмлэхүй олонхийн суудал эзлэх хэмжээний санал өгч засаглалын хямралаа засахыг үүрэг болгосон ч өнөөг хэр нь эрх мэдэл “Өлдөх”-ийн зовлон гээчийг Ардын намынхан амсаж байгаа нь гашуун үнэн. Гагцхүү сонгуулийн амлалт гэхээсээ төрийн эрх барих дээд байгууллагын 76 суудлын 65-ыг нь “бярдсан” МАН нэг Ерөнхий сайд, дахин нэг парламентын спикерээ солин байж Үндсэн хуульдаа гар хүрсэн нь саяхан.

Хуульд заасан үндэслэл, тэр дагуу хэлэлцсэн “Эцэг хууль”-ийн нэмэлт, өөрчлөлтийн хүрээнд энэ сарын 30, 31-нд Ард нийтийн санал асуулга явуулахаар зэхэж байв. Гэвч Ерөнхийлөгч Х.Батттулгын зүгээс УИХ-аас баталсан Үндсэн хуулийн нэмэлт, өөрчлөлт болон Ард нийтийн санал асуулга явуулах тогтоолын төсөлд хориг тавьсныг МАН өөрсдөө хүлээж авсан нь хуульчдын дунд маргаан дагуулж, хэлэлцүүлэг өрнүүлэх төвшинд хүрээд байна. Сонирхолтой нь, уг асуудлыг УИХ-ын чуулганы нэгдсэн хуралдаанаар хэлэлцэх үеэр гишүүн С.Жавхлан байр сууриа илэрхийлэв.  

Тэрбээр “Миний хувьд хоригийг дэмжиж байгаа юм. Цаг үе нь болоогүй байна. Өвөлжилтийн бэлтгэл, тариа ногоо, хүүхдийн ханиад томуу, утаа гээд асар их зүйл хөвөрнө. Гэтэл энэ цагаар санал асуулга явуулах нь ирц хүрэхгүй, гаргалгаагүй болох юм. Зөв мэдрэмжтэй цагтаа асууж болно. Санал асуулгыг огт асууж болохгүй гэдэг үйл алга байна. Ерөнхийлөгчийн хоригийг хэлэлцэх байхад Ерөнхийлөгч хааччихсан юм бэ. Өөрөө ирж ажлаа хийгээч ээ. Бие оторлоод байгаа юм уу. Уг нь намрын чуулганы нээлт дээр ирээд байх хэрэгтэй. Эсвэл Ерөнхийлөгчийн засаглалыг хэлэлцэх боломжгүй гээд хориг тавьж байгаа юм уу. Араас нь УИХ тарна гээд зөндөө ярьсан. Ийм зүйлд эв нэгдлийн бэлгэ тэмдэг гэдэг утгаараа ирээд, бүх зүйлээ тайлбарлаад, гарц гаргалгааг нь гаргах хэрэгтэй. Урдаа шатрын хүү тавьж байгаа юм шиг өмнөө Тамгын газрын даргаа ирүүлдэг. Нэртэйгээр нь Тамгын газрын даргадаа ажлаа өгчихмөөр юм” хэмээсэн нь улс төр, нийгмийн хүрээнд хэсэгтээ хэлэлцүүлэг өрнүүлэх бололтой.

Г.Эрхэс