Дэлхий дээр сэтгэл гутрах эмгэгтэй 300 сая хүн байдаг бөгөөд 40 секунт тутамд нэг хүн амиа хорлодог байна. Тиймээс жил бүрийн аравдугаар сарын 10-ны өдрийг Сэтгэцийн эрүүл мэндийн дэлхийн өдөр болгож, амиа хорлохоос урьдчилан сэргийлэхэд дэлхий даяараа анхаардаг уламжлалтай. Тиймдээ ч манай улс “Амь аврах 40 секундийн үйлдэлд нэгдэцгээе” уриалгад нэгдсэн байна.
ДЭМБ-ын судалгаагаар зонхилон тохиолдох сэтгэцийн өвчний тархалт ихтэй бүсийн 15 орны долдугаарт Монгол Улс эрэмбэлэгджээ. Үүний дотор сэтгэл гутрах эмгэгийн тархалтаар Австрали, Шинэ Зеланд улсын дараа манай улс жагссан байна. Харин 100 мянган хүн тутамд амиа хорлож буй тохиолдлын тоогоороо зургаадугаарт жагсжээ. Сэтгэл гутрах эмгэг нь голдуу залуу насанд тохиолддог учраас нийгмийн амьдралд нь сөргөөр нөлөөлж, удаан хугацаанд хөдөлмөрийн чадвараа алдахад хүргэдэг талаар дээрх судалгаанд мөн дурджээ.
Ташрамд дурдахад, Номхон далайн баруун бүсийн орнуудад сэтгэцийн эмгэгтэй 100 сая гаруй хүн байдгаас өдөрт 500 нь амиа хорлодог байна.