Сайжруулсан түлш тойрсон асуудлаар нийслэлийн Мэргэжлийн хяналтын газар болон Онцгой байдлын газраас мэдээлэл хийлээ.

Нийслэлийн Засаг даргын Тамгын газраас айл өрхүүдэд шахмал түлшийг хэрхэн түлэх талаарх зөвлөмж хүргүүлэн, танилцуулж байгаа. Уг зөвлөмжийн дагуу галлах хэрэгтэйг албаныхан онцолж байна. сэрэмжлүүлэг мэдээллийг зарим хороодод хүргэж дуусчээ. Ингээд мэргэжлийн байгууллагуудад ирсэн хоногийн нөхцөл байдлын мэдээг хүргэе.

НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Энэ сарын 9-ний өдрийн байдлаар 17 өрхийн 34 иргэн угаартсан байж болзошгүй дуудлага ирсэн. Үүнээс 18 нь хүүхэд байна. Өнөөдрийн байдлаар эмнэлэгт 9 том хүн, гурван хүүхэд хэвтэн эмчлүүлж байна. Амь эрсэдсэн тохиолдол гараагүй. Иргэдийн зүгээс хувийн бэлтгэлээ базаах зайлшгүй шаардлагатай байна. Учир нь нийт айл өрхийн дийлэнхийг ханан пийшин эзэлдэг.

Олон жил ашигласнаас үүдэн ан цав үүссэн, зориулалтын хавхлагыг авч хаясан, хэтрүүлэн галладаг, үнс ихтэй байгаагаас угаарын хийнд хордох эрсдэл их байгаа учраас болзошгүй эрсдэлээс урьдчилан сэргийлэхийг” анхааруулав.

Нийслэлийн Мэргэжлийн хяналтын газрын дэд дарга С.Даваасүрэн “Иргэд түлшээ хэрхэн зөв хэрэглэх вэ гэсэн зөвлөмжийн нийслэлийн Засаг даргын Тамгын газраас айл өрхүүдэд тарааж байгаа ажилд хяналт хийж байна. Энэ сарын 9-ний өдрийн байдлаар нийт 133699 айл өрхөд мэдээлэл өгч, ажиллажээ. Мөн нийслэлийн Мэргэжлийн хяналтын улсын байцаагч нар “Тавантолгой түлш” ХХК-ийн үйлдвэрт байнгын хяналт тавин ажиллаж байна. Өчигдөр дуудлага ирсэн газруудад очиж үзэхэд тараах материал нь хүрсэн. Мэдээллээ хүлээн авсан ч зааварчилгааны дагуу галлагааг хийгээгүйн улмаас угаартаж байна. Мэргэжлийн байгууллагаас өгч байгаа зөвлөмжийг дагаж мөрдөх шаардлагатай” гэлээ.

Түргэн тусламжийн 103 төв утсанд өчигдрийн байдлаар 34 иргэний дуудлага ирснээс хүнд хорлоготой нөхцөл байдал илрээгүй аж.

Б.Лхам