Энэ долоо хоногт Тээврийн цагдаагийн алба нийт 1251 дуудлага, мэдээлэл хүлээн авснаас 912  зам тээврийн ослын шинжтэй дуудлагыг шалгаж, шийдвэрлэжээ.

Бүртгэгдсэн зам тээврийн ослын улмаас 19 хүн гэмтэж, ноцтой зам тээврийн ослын улмаас нийслэлд нэг, орон нутагт нэг хүний амь нас хохирсон байна. Үүнээс найман  хүүхэд хүнд, хүндэвтэр гэмтэж, нэг хүүхдийн амь нас хохирсон байна.

Тухайлбал, энэ сарын 09-ний өдөр 19.36 минутын орчимд Баянзүрх дүүргийн 22 дугаар хороо Зүүн Алтан өлгийн замд Тоёота приус маркийн автомашины жолооч, явган зорчигч 11 настай, эрэгтэй Г мөргөж амь насын хохироожээ.

Мөн энэ сарын 10-ны өдрийн 05.20 цагийн орчимд Өмнөговь аймгийн Ханбогд сумын нутагт Mazda Tribute маркийн автомашин онхолдож, жолооч Н нас барсан байна. 

Түүнчлэн алба хаагчдаас хийсэн хяналт, шалгалтын үеэр согтуугаар тээврийн хэрэгсэл жолоодсон 121 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 27 хүнийг шүүхээр баривчилж хуулийн дагуу хариуцлага тооцсон байна. 

Энэ долоо хоногт бүртгэгдсэн зам тээврийн осол, хэргийг өмнөх долоо хоногийн нөхцөл байдалтай харьцуулахад нийт дуудлага мэдээлэл 5.6 хувиар, зам тээврийн ослын шинжтэй дуудлага 11.1 хувиар, гэмтсэн хүний тоо 13.6 хувиар өссөн бол гэмтсэн хүүхдийн тоо 14.2 хувиар тус тус буурсан  байна.

Иймд иргэд, жолооч та замын хөдөлгөөнд оролцохдоо хурд хэтрүүлэхгүй байж, автомашиныхаа аюулгүй байдлыг хангаж оролцохыг уриалж байна. “ДУРААРАА БИШЭЭ ДҮРМЭЭРЭЭ” хөдөлгөөнд оролцъё.