Тавдугаар төвшний хор хөнөөл, хохирол учруулах эрсдэлтэй тооцогдох Хагибис хар салхи энэ сарын 12-нд буюу өчигдөр Японы нийслэл Токио хотыг хамарсан газар нутгийг дайран өнгөрлөө. Ийнхүү хар салхи Токио хот орчим болон зүүн хойд бүс нутгийг дайрсныхаа дараа Номхон далайн гүн рүү шилжиж байна. Хар салхины улмаас голууд үерлэж, хөрсний нуралт үүссэн бөгөөд энэ үеэр 5 хүн амиа алдаж, 15 хүн сураггүй болсон бол орон даяар 90 гаруй хүн бэртэж, гэмтсэн байна. Японы зүүн хойд бүсийн 41,000 өрх гэрэл цахилгаангүй болсныг Tohoku Electric Power компани өчигдөр мэдээллэсэн. Түүнчлэн Хоншү арлын 6 сая оршин суугчид орон гэрээ орхин нүүх зөвлөмж хүргүүлсэн бол 1 сая гаруй иргэнийг хар салхины голомтот бүсээс яаралтай нүүлгэн шилжүүлсэн юм.
Өнөөдөр өглөөнөөс эхлэн онц байдлыг хэсэгчлэн цуцалж, хурдан галт тэрэгний үйлчилгээнүүд сэргэж эхэлсэн байна.
