Сонгомол, чөлөөт бөхийн 2019 оны Мастеруудын ДАШТ өнгөрсөн лхагва гаригт Гүржийн нийслэл Тбилис хотод эхэлсэн. Чөлөөт бөхийн эхний өдөр буюу “В” (41-45 нас), “Е” (56-60 нас) ангиллын жингүүдийн барилдаан өчигдөр боллоо. Дээрх ангилалд манай улсаас зургаан бөх зодоглосноос дөрвөн хүрэл медаль хүртэв.
Тодруулбал, “Е” ангиллын 88 кг-ын жинд ОУХМ Б.Бат, “В” ангиллын 62 кг-д спортын мастер Ж.Хурц, 78 кг-д спортын мастер Б.Баянсан, 88 кг-д ОУХМ Д.Ганбат нар хүрэл медаль хүртлээ. Үүнээс “Тулгат” клубийн тамирчин ОУХМ Д.Ганбат мастеруудын ДАШТ-ээс дөрөв (“Белград-2014”, “Валбжих-2016”, “Скопье-2018”-д хүрэл медаль хүртсэн) дэх хүрэл медалиа хүртсэн бол ОУХМ Б.Бат өнгөрсөн жил Македонд хүртсэн хүрэл медалиа Тбилисид ихэрлүүлэв.