...Хөтөлийн цемент шохой төрийн өмчит хувьцаат компанийн Дулааны станцын техникийн бүрэн бүтэн ажиллагаа болон Хөтөл тосгоныг дулаанаар тасралтгүй найдвартай хангах үүргийг хүлээх, Барилга, хот байгуулалтын яамтай гэрээ байгуулан ажиллах үүргийг хөрөнгө оруулагч “Бэйзмент” компанитай байгуулах гэрээнд тусгахыг Бүтцийн өөрчлөлт, хувьчлалын газрын дарга Д.Эрэвгийлхамд үүрэг болгосугай...

Энэ бол Төрийн өмчийн хорооны дарга Ц.Нанзаддорж, Тамгын газрын дарга Ц.Одмаа нарын гарын үсэг бүхий 2015 оны аравдугаар сарын 8-нд гаргасан тогтоол. Хөтөлийн цемент шохой үйлдвэрийн төрийн эзэмшлийн хувьцааг худалдах УИХ, Засгийн газрын тогтоолын хүрээнд холбогдох байгууллагын удирдлагын төвшинд гаргасан шийдвэр. УИХ-ын тогтоолын эцсийн найруулгыг уншиж хүргэсэн хүн нь спикер асан З.Энхболд, тухайн үеийн Барилга, хот байгуулалтын сайд нь МАХН-МҮАН-ын “Шударга ёс” эвслээс квоттой З.Баянсэлэнгэ байв. Мэдээж хүнд үйлдвэрийн бодлогыг бүхэлд нь зангидаж байсан Аж үйлдвэрийн сайд асан Д.Эрдэнэбат ч үүнд хамаардаг. Одоо тэрбээр Үндсэн хуулийн нэмэлт, өөрчлөлт, АН-д үүссэн дотоод “зодоон”-ыг зохицуулах гээд завгүй яваа байх. Парламентад дөнгөн данган Бүлэг байгуулах хэмжээний суудалтай болсон Ардчилсан нам Зөвлөлийн хэмжээнд үйл ажиллагаа явуулах хэмжээнд хүртлээ тартагтаа тулсан энэ цаг үед даргаар нь ажиллаж байгаа хүний хувьд. Бас ч гэж АН-ын ерөнхий нарийн бичгийн даргаар ажиллаж, сайдын сэнтийд заларч, хоёронтоо төр түшилцэх гишүүнээр сонгогдож, өдгөө долоон гишүүнтэй Зөвлөлийн өмнөөс байр суурь илэрхийлэх хэмжээнд намтраа арвижуулж яваа улстөрчийн хувиар шүү дээ.

Хамгийн гол нь, нэгж хувьцаа бүрийг нь 10-11 төгрөгөөр үнэлж нийт 1.3 тэрбум орчим төгрөгөөр хувьд 100 хувь шилжүүлсэн, “Бэйзмент” компанийн мэдэлд шилжсэн Хөтөлийн цемент шохой үйлдвэрийг түшиглэсэн Дулааны цахилгаан станцыг төрд буцаан өгөх гэж буй тухай мэдээлэл сонсогдож эхэллээ. Уг нь гэрээгээр хүлээсэн үүргийнхээ хүрээнд Хөтөлийн цемент шохой үйлдвэрийг төдийгүй тухайн орчимд суурьшин буй 9325 иргэдийн  дулаанаар хангах үүргийг “Бэйзмент” компанийнхан хүлээсэн байдаг юм.

Цаашлаад “Аж үйлдвэр, газар тариалан, мал аж ахуй дэд бүтэц, үндэсний эрүүл хүнс, үйлдвэрлэлтээрээ аймаг болон улсдаа тэргүүлэх, төрийн байгууллагаас иргэддээ үзүүлэх үйлчилгээний хүртээмжийг ил тод нээлттэй болгох, нутгийн удирдлагын байгууллагын бүтцийг оновчтой зохион байгуулах”, энэ хүрээнд Хөдөлмөрийн баатар хүртэл төрүүлж байсан Сэлэнгэ аймгийн Сайхан сумын төв Хөтөл хот /Статистик тоо баримтыг 2019 гуравдугаар сард өөрчилнөөр эшлэв/ бусдаасаа арвин түүхтэй Хөтөлийг өвөлдөө хөлдөөлөхгүй байх үүргийг УИХ, Засгийн газрын шийдвэрт үндэслэн гаргасан Төрийн өмчийн хорооны тогтоолын хүрээнд үүрэг хүлээсэн нь энэ. Гэвч АН эрх барьж байсан үед улсаараа дэнчин тавьж гадаадын хөрөнгө оруулагчдаас зээлсэн Бондоос 62 сая ам.долларын санхүүжилт авч үйлдвэрлэлийнхээ хүчин чадлыг нэмэгдүүлсэн Хөтөлийн цемент шохой компанийн удирдлагууд тухайн орчмыг дулаанаар хангах учиртай цахилгаан станцыг төрд буцаан шилжүүлэх асуудлыг хөндөж эхэлсэн нь хачирхалтай биш гэж үү?!.

“Aтрын II” аяныг хэрэгжүүлэхийн тулд 1976 онд анхлан байгуулсан, тэр хэрээрээ аж үйлдвэрийн гал голомтын нэг болсон Хөтөлийн цемент шохой компанийн хүчин чадлыг нэмэгдүүлж, жилдээ сая тн-ыг үйлдвэрлэхээр болж, тухайн үеийн сайд, дарга нар очиж тууз хайчилж байсан нь саяхан. Гэвч 30 жилийн түүхтэй улсын үйлдвэр төдийгүй түүнээс ажил, амьдралаа залгуулдаг иргэдийг өвөлдөө өнтэй золгуулах учиртай дулааны цахилгаан станцыг төрд буцаан өгөх болсны цаад шалтгаан нь юу байв?!. Гэрээ ёсоор бол Хөтөлийн цемент, шохой үйлдвэр болон Хөтөл хотын иргэдийг өнтэй өвөлжүүлэх асуудлыг “Хөтөл” /хувьчлах үедээ байсан хуучин нэршил нь “Бэйзмент”/ компани 100 хувь хариуцах ёстой. Төрийн өмчийн хорооны А/608 дугаар тогтоолын дөрөвдүгээр зүйлд энэ тухай тодорхой дурдсан байна. Өөрөөр хэлбэл,  “Хөтөлийн цемент шохой төрийн өмчит хувьцаат компанийн Дулааны станцын техникийн бүрэн бүтэн ажиллагаа болон Хөтөл тосгоныг дулаанаар тасралтгүй найдвартай хангах үүргийг хүлээх, Барилга, хот байгуулалтын яамтай гэрээ байгуулан ажиллах үүргийг хөрөнгө оруулагч “Бэйзмент” компанитай байгуулах гэрээнд тусгахыг Бүтцийн өөрчлөлт, хувьчлалын газрын дарга Д.Эрэвгийлхамд үүрэг болгосугай” гэж.

Гэтэл ашиггүй ажиллаж байна гэх нэрийдлээр өмчилсөн газраа төрд буцаан өгөхөөр болсныг юу гэж ойлгох вэ.

Угтаа бол, уул шугамандаа алдаглалтай ажилласан ч, зохих хариуцлагаа үүрээд явах тухай төр, хувийн хэвшил хооронд байгуулсан гэрээнд тодорхой дурдсан нь, харилцан хүлээн зөвшөөрсөн нь тов тодорхой, цагаан дээр хараар бичээстэй байна. Үнэхээр “Хөтөл” компани ашиггүй ажиллаж байна гэх нэрийдлээр дулааны цахилгаан станцыг төрд буцаан өгөхөөр болсон нь үнэн л юм бол үйлдвэрийг нь ч хамтад нь өгөх ёстой. Хатуу ч гэсэн энэ үнэн. Гэрээгээ зөрчсөн бол холбогдох хариуцлагаа хүлээж, хуулийн өмнө очдог нь дан ганц манайд гэлтгүй олон улсад мөрддөг жишиг. Энд төрөөс, татвар төлөгчдийн халааснаас гарсан 62 сая ам.доллар, өдөр бүр хүүнд нь төлж байгаа мөнгөн дүн ч хамаарна.

1.Алдуурсан “Хөтөлийн цемент шохойн” үйлдвэрийг аргамжих шалтгаан-1 

https://www.24tsag.mn/a/176299 

2. “Хөтөл”-ийн хувьчлалаар ганц ч үг ганхийлгэхгүй байх шалтгаан гишүүн Д.Эрдэнэбатад бий юу?  

https://www.24tsag.mn/a/176317 

3. Хаусны үнэтэй Хөтөлийн хувьчлал 

https://www.24tsag.mn/a/176360  

Үргэлжлэл бий.

С.Гандөл