Өнгөрсөн зургадугаар сараас хойш ирц хүрээгүй гэдэг шалтгаанаар удаа дараа хойшилж, хуралдаж чадаагүй байсан УИХ-ын Ёс зүйн дэд хороо өнөөдөр хуралдах товтой байсан ч дахин хойшиллоо. Дэд хорооны өнөөдрийн хуралдаанаар УИХ-ын гишүүн Л.Болд, Ж.Мөнхбат, М.Оюунчимэг нарын хөрөнгө, орлого огцом өссөн асуудал болон Шадар сайд Ө.Энхтүвшиний гишүүдийн картыг сугалсан, УИХ-ын гишүүн Б.Пүрэвдоржийн Хууль зүйн байнгын хорооны хуралдааны үеэр аягаар ширээ нүдэж эсэргүүцэл илэрхийлсэн зэрэг "ноцтой" асуудлыг хэлэлцэх ёстой байсан ч дахин хойшлогдсон юм. 

Энэ талаар УИХ-ын гишүүн, УИХ-ын Ёс зүйн хорооны дарга Б.Бат-Эрдэнэ "Шадар сайд Ө.Энхтүвшин, УИХ-ын гишүүн Б.Пүрэвдорж нар оролцоогүй учир хойшлуулъя гэдэг саналыг Д.Эрдэнэбат гишүүн гаргасан. Энэ саналыг гишүүдийн олонх дэмжиж, хэлэлцэх асуудлыг хойшлууллаа" гэсэн юм. Харин УИХ-ын гишүүн Л.Болд, Ж.Мөнхбат, М.Оюунчимэг нарын хөрөнгө гэнэт өссөн асуудлыг хэлэлцэх мөн товтой байсан ч хоёр гишүүн нь гадаадад томилолттой гэдэг шалтгаанаар хуралд ирээгүй юм. Хөрөнгө орлого нь огцом нэмэгдсэн дээрх гурван гишүүний хувьд ямар нэг тайлбар ирүүлээгүй гэдгийг дэд хорооны дарга Б.Бат-Эрдэнэ хэлсэн.

УИХ-ын Ёс зүйн хорооны дүрмэнд зааснаар хурлаар хэлэлцэх гишүүдийг өөрсдийг нь байлцуулж, тайлбарыг нь сонсох ёстой байдаг аж. Тиймээс Ёс зүйн хорооны гишүүдийн олонх нь ажлын хэсэг байгуулах шаардлагагүй гэж энэ удаа үзсэн бөгөөд дээрх гурван гишүүнээс тайлбар авах үүргийг УИХ-ын гишүүн Г.Тэмүүлэн хүлээсэн аж.

Ийнхүү УИХ-ын Ёс зүйн дэд хорооны хуралдаан дахин хойшиллоо. Ирэх долоо хоногт хуралдахаар дахин товолсон дэд хорооны хуралдаанаар нэр бүхий гишүүдийг заавал ирүүлж, асуудлыг нь ярина гэдгийг дэд хорооны дарга Б.Бат-Эрдэнэ мөн хэлсэн юм. 

Г.Эрдэнэ