УИХ-ын гишүүн Х.Нямбаатарын орлого хэд хэдэн дахин өссөн байна гэдэг мэдээллийг "Бид уучлахгүй" хөдөлгөөнөөс өнөөдөр мэдээллэсэн билээ. Тэгвэл уг мэдэгдлийн хариуд УИХ-ын гишүүн Х.Нямбаатар хариулт өглөө. Тэрбээр "Үндэслэлгүй хөрөнгөжсөн гэх гишүүдийн дунд миний нэр байгаагүй. Ёс зүйн дэд хорооны дарга Б.Бат-Эрдэнийн хэлсэн үгнээс харсан байх. Хууль зүйн байнгын хорооны хуралдааныг Пүрэвдорж тасалдуулсныг Ёс зүйн дэд хорооны хуралдаанаар хэлэлцэх саналыг би гаргасан. “Бид уучлахгүй” хөдөлгөөний мэдэгдлийн хувьд би 2009 оноос хойш тасралтгүй хөрөнгө орлогоо мэдүүлж ирсэн. Өөрийн орон сууцаа худалдвал зарсан орлого нь орлого болж нэмэгддэг. Би 2018 онд өөрийн хоёр давхар зуслангийн орон сууцаа бусдад худалдсан. Энэ нь надад орлого болж харагдсан байх. Би хүн амын орлогын албан татвараа төлсөн.

Би аж ахуйн чиглэлээр үйл ажиллагаа явуулдаг компанитай. 2014-2016 оны хооронд эдийн засаг сааралттай байсан. Та бүхэн мэднэ.

2017 оноос эдийн засаг сэргэх үеэс миний барьж байгаа орон сууцны борлуулалт тодорхой хувиар нэмэгдсэн. Энэ нь орлого болж нэмэгдэх нь тодорхой. Би өөрийнхөө олсон бүх орлогоо цэнхэр дэвтэр дээрээ бичилт хийлгэдэг. АТГ-д өгөөд намайг шалгуулах хэрэгтэй. Сонгууль дөхсөн болохоор зориудаар бусдыг гүтгэх гэсэн оролдлого байх шиг байна. Би хаана ч шалгуулахад бэлэн. Би бүх татвараа төлсөн. Илүү хулгай хийдэг хүмүүстэйгээ тэмц. Миний хөрөнгө бол цэвэр олсон орлого. Татвараа төлсөн. Бизнес хийж олсон орлого” гэлээ.

 Г.Нацаг