УИХ-аас Эрүүл мэндийн тухай хуульд нэмэлт оруулах тухай хуулийн төслийг баталсан билээ. Үүнтэй холбогдуулж УИХ-ын гишүүн Д.Дамба-Очир мэдээлэл хийлээ.

Тэрбээр “Хорт хавдар тусаагүй айл өрхийг олоход хэцүү. Дөрөвдүгээр шатандаа буюу нэлэнхүйд нь үсэрхийлсэн үедээ илэрч байгаа. Улсын төсөвд тодорхой хэмжээний мөнгө тусгасан учраас шинжилгээний ажлыг хийнэ. Бидний амьдралын хэв маяг, хоол хүнстэй холбоотой хорт хавдрын өвчлөл нэмэгдэж байна. Энэ хүрээнд эрүүл тогтолцоо амаргүй байгаа учраас холбогдох хуульд өөрчлөлт оруулах хэмжээнд шийдвэр гаргалаа. Нийтдээ 39.4 тэрбум төгрөг суулгасан. Гол нь иргэд өөрсдийн амьдралын хэв маяг, хооллолтыг анхаарах хэрэгтэй. Хуулийг баталсан болохоор төсөвт мөнгө суулгах байх. Цаашид яамдын хийх ажил үлдэж байна. 2020 оноос нийт иргэдээ оношилгоонд оруулаад яваасай гэж хүсэж байна. Цаашдаа хавдрын хэмжээ багасана” гэлээ.

Эрүүл мэндийн яам жил бүр шаардлагатай байгаа тоног төхөөрөмжийг улсын төсөвт суулгадаг. Энэ жилийн хувьд тус салбарт 11 компьютер томограффын аппарат, 19 ходоодны дурангийн аппарат нэн шаардлагатай байгаа тул хуулийн төсөлд оруулжээ. Эрүүл мэндийн салбарын нийт эмнэлгийн барилгын 80 хувь нь 2004 оноос өмнө баригдсан тул шинэчлэх, засварлах шаардлагатай байгаа юм байна. Мөн хавдраар өвчлөгсдийн сэргээн засах, туяа, зарим химийн болон хөнгөвчлөх эмчилгээг Эрүүл мэндийн даатгалд хамруулжээ. Түүнчлэн 2018 оноос хүн амыг насны бүлгээр дөрөв ангилж түүнд хамрагдах урьдчилан сэргийлэх үзлэгийг эрүүл мэндийн даатгалд хамруулж, 4,5 тэрбум төгрөгийг зарцуулаад байгаа аж.

С.Сүлд