Нэр бүхий ТББ-аас УИХ-ын зарим гишүүнтэй холбоотой үндэслэлгүй хөрөнгөжсөн тухай мэдээллийг Ёс зүйн дэд хорооны дарга Б.Бат-Эрдэнэд хүргүүлж шалгуулахаар хандсан билээ. Үүнтэй холбоотойгоор нэр дурдагдсан гишүүдийн нэг Ж.Мөнхбат байр сууриа илэрхийлсэн юм.

Тэрбээр “Миний хөрөнгө орлогын мэдүүлэгтэй холбоотой гомдлыг ТББ-аас гаргасан юм байна. Тэр асуудлаар Ёс зүйн дэд хороо хуралдаад тайлбар өгнө үү гэсэн албан тоот ирсэн. Тэр дагуу тайлбар өгсөн. Хууль зөрчиж хөрөнгөжсөн асуудал байхгүй. Тайлбараа өгсөн болохоор түүний дараа холбогдох мэдээллээ өгье. Дэд хорооны дарга Б.Бат-Эрдэнэ мэдээлэл хийж байна лээ. Цаашдаа энэ асуудлаар холбогдох хуульд нь нэмэлт, өөрчлөлт оруулахыг дэмжиж байгаа. Яагаад гэхээр хөрөнгө орлогоо мэдүүлсний төлөө хүний нэр төрд халдаж болохгүй. Үндэслэлгүй хөрөнгөжсөн гээд шуугиан үүсгээд байгаа нь буруу. Шаардлагатай тохиолдолд хуулийн байгууллага нь шалгаад олон нийтэд мэдээлэх талаар хуульд оруулах ёстой. Албан ёсны хариуг Дэд хорооны хуралдааны дараа хэлэх нь зөв байх. Тэрбум төгрөгийн орлоготой болсон гэдгийг олон дахин яриад байх хэрэггүй болов уу. Өөрийгөө өмөөрч байгаа юм шиг харагдана. 800 орчим сая төгрөгийн асуудал яригдаж байгаа. Дэд хороонд түүнийгээ тайлбарлана. Нэг зүйлийг онцолж хэлэхэд үндэслэлгүй хөрөнгөжсөн, хууль зөрчсөн асуудал байхгүй” гэв.

С.Сүлд