Манай улсын нийт 175 иргэн харийн улсад ял эдэлж буй. Тэдгээрийг ялтан солилцоогоор эх орондоо авчирахаар холбогдох арга хэмжээг авч байгаа ч дорвитой шийдэлд хараахан хүрээгүй байна. Тодруулбал, манай улсын иргэд дараахь улсуудад ял эдэлж байна.
- БНХАУ-д-115
- БНСУ-д-18
- Макаод-12
- ОХУ-д-9
- Турк улсад-9
- Казахстанд-6
- АНУ-д-3
- Сингапурт-3
- Чех улсад-2
- Бельги улсад 2
- Шведэд 2
- Словак улсад-1
- Японд-1
- Унгарт-1
- Польш улсад-1
- Тайландад-1
- ХБНГУ-1
Эдгээрийн олонх нь мансууруулах бодис, сэтгэцэд нөлөөт эм бэлдмэл хадгалж, тээвэрлэсэн хэрэгт буруутгагдан, шүүхээс ял шийтгүүлсэн юм. Тэгвэл Гэмт этгээд харилцан шилжүүлэх тухай Монгол Улс, Бүгд Найрамдах Социалист Вьетнам Улс хоорондын гэрээг соёрхон батлах тухай хуулийн төслийг УИХ-д өргөн мэдүүлэх нь зүйтэй гэж энэ сарын 23-нд болсон Засгийн газрын худалдаанаар үзлээ. Энэ оны аравдугаар сарын байдлаар БНСВУ-ын гурван иргэн манай улсад ял эдэлж байна. Харин тус улсад ял эдэлж байгаа Монгол Улсын иргэн байхгүй.
Өнөөдрийн байдлаар Монгол Улс 18 улстай гэмт этгээд харилцан шилжүүлэхтэй холбоотой гэрээ байгуулсан. БНСВУ-аас гэмт хэрэгтэн шилжүүлэх хуулийн төслөөс гадна Макаод ял эдэлж буй Монгол иргэдийг эх орондоо авчирах хуулийн төслийг мөн хэлэлцлээ. Тодруулбал, Эрүүгийн хэргийн талаар эрх зүйн туслалцаа харилцан үзүүлэх тухай Монгол Улс, БНХАУ-ын Засаг захиргааны онцгой бүс Макао хоорондын хэлэлцээрийг соёрхон батлах тухай хуулийн төслийг УИХ-д өргөн мэдүүлэхээр боллоо. 2019 оны байдлаар манай улсын 12 иргэн Макаод ял эдэлж байна. Харин Монгол Улсад ял эдэлж байгаа Макаогийн иргэн байхгүй. 2018 онд Макаогаас 127 иргэн, Монгол Улсаас 175 иргэн харилцан зорчсон гэх гаалийн байгууллагын мэдээлэл бий. Хэрвээ дээрх хуулийн төсөл дэмжигдэж батлагдвал Вьетнам, Макаод ял эдэлж буй Монгол Улсын иргэд эх орондоо ирэх боломж нээгдэх юм.
Ташрамд дурдахад, манай улсад гадаадын 19 иргэн ял эдэлж байгаа аж.
Г.Алимаа
