Энэ жилийн Улсын баяр наадамд шөвгөрсөн бөхчүүдийн хоёроос сэргээшийн төрлийн бодис илэрсэн нь наадамчин олны дунд хэрүүлийн алим өнхрүүлсээр өнөөг хүрч байна.

Хоёр бөхийн нэгээр тодорсон отгон аварга Э.Оюунболд сүүлд сэргээш илэрсэн талаарх шинжилгээнийхээ хариуг хүлээн зөвшөөрөхгүйгээ мэдэгдэж, холбогдох хууль хяналтын байгууллагаар шалгуулахаа мэдэгдсэн. Улмаар шүүхэд гомдол гаргасан ч хүсэлтийг нь хүлээж аваагүй билээ.

Түүнээс хориотой эмд тооцогдох, сэргээшийн төрлийн дөрвөн бодис илэрснийг Үндэсний баяр наадмыг зохион байгуулах комиссын Бөхийн салбар хорооноос мэдэгдсэн нь  үндэсний бөх болон их спортынхны “Хар жагсаалт”- д өмнө нь гарч байгаагүй үйл болж, цочир хүлээж авах шалтгаан болсон юм. Отгон аварга энэ тухайгаа “Допинг хэрэглээгүй, намайг хэлмэгдүүлж байна” хэмээн хуулийн байгууллагад хандсан ч шүүх хүлээж аваагүй нь саяхан.

Үүний дараа Баяр наадам зохион байгуулах хорооны дарга, Шадар сайд Ө.Энхтүвшин “Допинг илэрсэн бөхчүүдийн цолыг хураах асуудлыг өнөөдөр хуралдаж шийдвэрлэнэ” гэдгээ илэрхийлсэн юм.

Шадар сайдын хэлснээр Үндэсний бөхийн салбар комиссын саналыг хэлэлцэж, допинг хэрэглэсэн бөхийн цол, чимгийг хураах, барилдах эрхийг хасах, тэдэнд унасан бөхчүүдийн цол, чимгийг нэмэх асуудлыг өнөөдөр эцсийн байдлаар шийдвэрлэж, Ерөнхийлөгч Х.Баттулгад хүргүүлэх бололтой.

Хуульд зааснаар үндэсний бөхийн цолыг хураах эсэх асуудал нь Ерөнхийлөгчийн бүрэн эрхэд хамаардаг. Нэг үгээр Үндэсний баяр наадмыг зохион байгуулах хорооноос гарсан шийдвэрт үндэслэж Э.Оюунболд аваргын цолыг хураах эсэх нь Ерөнхийлөгчөөс шууд хамаарахаар болж байна.

Б.Жаргал