Тээврийн цагдаагийн албаны Жижүүрийн шуурхай удирдлагын хэлтэс 2019 оны аравдугаар сарын 21-нээс 24-ны өдрүүдэд нийт 1206 дуудлага мэдээлэл ирсэн байна. Үүнээс 907 нь  зам тээврийн ослын шинжтэй дуудлага мэдээлэл бүртгэгдсэн бөгөөд зам тээврийн ослын улмаас 16 хүн гэмтэж, ноцтой зам тээврийн ослын улмаас нийслэлд 2, орон нутагт 6 хүний амь нас хохирсон байна. Үүнээс 4  хүүхэд хүнд, хүндэвтэр гэмтэж, 1 хүүхдийн амь нас хохирсон  байна.

Ноцтой зам тээврийн ослуудаас дурдвал:

-2019.10.22-ны өдрийн 19:10 цагийн орчимд СХД-ийн 9 дүгээр хороо Баянхошууны замд Toyota prius маркийн автомашины жолооч явган зорчигч 42 настай, эрэгтэй Б-г мөргөж амь насын хохироосон

-2019.10.20-ны өдөр 21:00 цагийн орчим Дорноговь аймгийн Сайншанд сумын нутаг шороон замд Хавужи маркийн улсын дугааргүй мотоцикл онхолдож, жолооч М нас барсан.

2019.10.21-ний өдрийн 11:30 цагийн орчимд Сүхбаатар аймгийн Уул-Баян сумын нутаг шороон замд  Dayun маркийн улсын дугааргүй мотоцикл онхолдож, жолооч Б нас барсан.

2019.10.21-ний өдрийн 18:58 цагийн орчимд Өмнөговь аймгийн Даланзадгад  сумын нутаг “Дөлгөөн” хүнсний дэлгүүрийн хойд замд Toyota Crown маркийн автомашины жолооч явган зорчигч 59 настай, эмэгтэй Д-г мөргөж амь насын хохироосон

2019.10.21-ны өдөр 20:15 цагийн орчим Дорноговь аймгийн Хөвсгөл сумын нутаг шороон замд Dayun маркийн улсын дугааргүй мотоцикл онхолдож, жолооч Б нас барсан.

2019.10.21-ны өдөр 21:48 цагийн орчим ХУД-ийн 3 дугаар хороо “Тэнүүн-Өлзий” ХХК-ны баруун замд Toyota prius маркийн автомашины жолооч явган зорчигч 65 настай, эрэгтэй Ж-г мөргөж амь насын хохироосон

-2019.10.23-ны өдөр 15:00 цагийн орчим Өмнөговь аймгийн “Сэврэй” сумын нутаг шороон замд Toyota маркийн мотоцикл онхолдож, зорчигч 5 сартай эрэгтэй Э нас  барсан.

2019.10.24-ний өдрийн 18:00 цагийн орчимд Дундговь аймгийн Эрдэнэдалай сумын нутаг шороон замд  Dayun маркийн улсын дугааргүй мотоцикл онхолдож, жолооч Э нас барсан.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 74 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 36 хүнийг шүүхээр баривчилж хуулийн дагуу хариуцлага тооцсон байна. 

Энэ 7 хоногт бүртгэгдсэн зам тээврийн осол, хэргийг өмнөх 7 хоногийн нөхцөл байдалтай харьцуулахад нийт дуудлага мэдээлэл 4.7 хувиар, зам тээврийн ослын шинжтэй дуудлага 5,5 хувиар, гэмтсэн хүний тоо 52.9 хувиар, гэмтсэн хүүхдийн тоо 33,3 хувиар  тус тус буурсан бол нас барсан хүний тоо 2 дахин өссөн  байна.

Ерөнхий боловсролын сургуулийн сурагчдын улирлын амралт энэ сарын 28-ны өдрөөс эхлэхтэй холбогдуулан эцэг, эх, асран хамгаалч, харгалзан явж буй иргэд та бүхэнд дараах зөвлөмжийг хүргэж байна. Үүнд:
1. Бага насны /10 хүртэлх/ хүүхдийг харгалзах хүнгүйгээр замын хөдөлгөөнд явганаар оролцуулахгүй байх үүрэгтэй тул үүргээ биелүүлэх
2. Явган зорчигч нь 10 хүртэл насны хүүхдийг замын хөдөлгөөнд харгалзаж явахдаа өөрөөсөө салгахгүй, хөтлөх, тэврэх, үүрэх, хүүхдийн тэргэнд түрж авч явах,
3. Ногоон гэрлээр, явган хүний гарц, гармаар зам хөндлөн гаргаж хэвшүүлэх. Зам тээврийн ослын хор уршгийг ойлгуулж, таниулах
4. Таны хүүхэд харанхуй, үзэгдэл хангалтгүй, гэрэлтүүлэггүй замаар гэр болон сургууль, дугуйлан, дамжаанд ирж очдог бол жолоочид харагдах нөхцөлийн сайжруулах үүднээс тод гэгээлэг өнгийн, гэрэл ойлгогчтой хувцас, хэрэглэлтэй явуулах
5. Зорчих хэсэг дээр зогсох, тоглох, эргэж буцах, тээврийн хэрэгслийн хөдөлгөөнд санаатайгаар саад хийхгүй байхыг анхааруулах
6. Унадаг дугуй, скүүтэр, ролик унахдаа хамгаалалтын малгай, өвдгөвч, тохойвч өмсгөж сургах
7. Зорчих хэсгээр явж байхдаа утсаар ярих, гар утас оролдох, дуут дохио болон анхааруулгыг сонсох боломжийг хязгаарласан чихэвч зүүхгүй байх
8. Хороолол дотор явган зорчигч давуу эрхтэй зорчих тул тээврийн хэрэгслийн жолооч та хөдөлгөөний аюулгүй байдлыг хангаж хөдөлгөөнд оролцох
9. 10 хүртэлх насны хүүхдийг автомашинаар тээвэрлэхдээ биеийн жин, өсөлтөнд нь тохирсон зориулалтын суудал, хамгаалах хэрэгсэл ашиглах. Хэрэв зориулалтын суудал ашиглах боломжгүй тохиолдолд хүүхдийг арын суудалд тээвэрлэж, хамгаалах бүсийг зүүж хэвших
10. 10 хүртэлх насны хүүхдийг мотоциклын арын суудалд тээвэрлэхгүй байх
11. Уулзвар гарц, сургууль орчмын бүсэд хөдөлгөөнд оролцож байгаа тээврийн хэрэгслиийн жолооч та хурдаа хасаж, хурдыг тогтоосон хязгаараас хэтрүүлэхгүй, аюулгүй байдлаа хангаж хөдөлгөөнд оролцохыг ТЭЭВРИЙН ЦАГДААГИЙН АЛБА-аас зөвлөж байна.