Эрээн-Улаанбаатар чиглэлийн нисэх онгоцоор “Чингис хаан” олон улсын нисэх буудалд буусан БНХАУ-ын иргэн C нь их хэмжээний валют улсын хилээр нууцаар оруулах гэж байгаад гаалийн байцаагчид баригдсан байна. Тодруулбал, уг хэрэг энэ сарын 14-нд гарсан бөгөөд сэжиг бүхий этгээдийн тээшийг шалгах үеэр зочид буудалд өмсдөг нэг удаагийн углаашны дунд 100 гаруй сая төгрөгтэй тэнцэхүйц ам.доллар, юань нуусан байжээ. Уг хэргийг цагдаагийн байгууллагаас хэрэг нээн шалгаж байна.

Үүнээс өмнө Сөүл-Улаанбаатар чиглэлийн онгоцоор ирсэн ОХУ-ын иргэн Г.В нь гар тээшиндээ 400 сая гаруй төгрөгтэй тэнцэх валют нууж оруулах гэсэн үйлдлийг гаалийн байцаагчид мөн илрүүлсэн. Тэгвэл Гаалийн тухай хуульд зааснаар улсын хилээр таван сая хүртэл төгрөгтэй тэнцэх хэмжээний валютыг нэвтрүүлэхийг зөвшөөрдөг бөгөөд Мөнгө угаах болон терроризмыг санхүүжүүлэхтэй тэмцэх тухай хуульд 15 сая төгрөг хүртэл болон түүнтэй тэнцэх хэмжээний валютыг гаалийн байгууллагад заавал мэдүүлэх үүрэгтэй юм.

Г.Алимаа