Амар амгалан хотхонд захиалга өгч хохирсон иргэд өнөөдөр мэдээлэл хийлээ. Иргэдийн хэлж буйгаар “Бид ажил хөдөлмөр эрхлэж цуглуулсан мөнгөөрөө байр захиалсан. Захиалга өгөөд хоёр жил болж байна. Бидэнд 2019 онд байр ашиглалтад орно гэж гэрээ хийсэн. Гэтэл өнөөдрийг хүртэл байр ашиглалтад ороогүй байна. Компанийн захиралтай уулзая гэхээр хэдэн удаа ирсэн. Хүлээ гэсэн. Бид хүлээсэн. Аргаа бараад цагдаад өгсөн. Гэтэл шалгалт ямар шатанд яваа нь мэдэгдэхгүй байна. Хохирогч хүмүүсийг загнаад байх юм, ямар учиртай юм бэ. Биднийг гэрээ хийх үед дөрвөн давхар хүртлээ байр байсан. Үүнийгээ мөн гэж хэлсэн.

Гэтэл өнөөдрийг хүртэл нэг ч тоосго нэмж тавиагүй байна. Сүүлдээ компанийн удирдлагууд бидэнтэй уулзахгүй байна. Аргаа барж байна. Нийтдээ 500 гаруй иргэн байрны урьдчилгаа төлбөр өгсөн. Үүнээс 300 гаруй нь байрны урьдчилгаагаа буцааж авахаар болсон. Хохиролын хэмжээ дөрвөн тэрбум төгрөг. Байрын танилцуулгадаа жилийн таван хувь, банк дамжихгүй, 10-30 хувийн урьдчилгаатай, 20 жилийн хугацаатай олгоно гэсэн. Үүнийг нь хууль бус гэж цагдаагаас хэлсэн. Луйварын шинжтэй зүйл юм билээ. Гэрээ хийх үед банк болон цалингийн зээлтэй байж болно гэж хэлсэн. Гэтэл одоо болохоор цалингийн зээлтэй хүнд зээл олдохгүй гэсэн. Д.Гүрсоронзон гээд захиралтай нь өнгөрсөн наймдугаар сард уулзсан.

Энэ хүнийг цагдаад өгсөн. Шалгалтын ажил үргэлжилж байгаа гэсэн. Прокурор, аудитын байгууллагад хандсан. Зарим айлууд орон сууцандаа орсон. Гэтэл гэрээ хийхгүй байна гэсэн. Өнгөрсөн есдүгээр сард төлбөр буцааж өгнө гэсэн атлаа өнөөдрийг хүртэл өгөөгүй. Нэг м.кв талбайг 1.4 сая төгрөгөөр бодож гэрээ хийсэн.