“Гэр, иргэдийн оролцоотой амьдрах орчны зураглалын төв” ТББ-аас Авлигатай тэмцэх газар, Нээлттэй нийгэм форумтой хамтран төрийн таван байгууллагын нээлттэй цахим мэдээллийг нэг хайлтын системд орууллаа.

Энэ нь анхдагч эх сурвалжийн мэдээллийг засваргүй, ашиглахад хялбар, хүртээмжтэй байдлаар нэгтгэсэн нь онцлог аж. Энэ талаар Авлигатай тэмцэх үндэсний хөтөлбөрийн ажлын албаны дарга, эрхэлсэн комиссар Д.Дуламсүрэн “Авлига, хүнд суртал, ашиг сонирхлын зөрчил ил тод нээлттэй байдалтай шууд холбоотой байдаг. Учир нь иргэд мэдээлэл дутмаг учраас тухайн тухайн төрийн үйлчилгээг шууд авч чадахгүй байна. Мөн шийдвэр гаргах түвшинд эсвэл бэлтгэх явцөд нь оролцъё гэхээр хаанаас ямар мэдээлэл авч дүн шинжилгээ хийх нь ойлгомжгүй байгаа учраас иргэд шууд хяналт хэрэгжүүлэх боломж байдаггүй. Иргэд авлигын эсрэг дуу хоолойгоо нэгтгэж төр засгийн шийдвэрийг хянах, иргэний хяналтыг хэрэгжүүлье гэж хүсэл зориг нэгдсэн байдаг боловч арга, аргачлалаа олохгүй байх тохиолдол олон байдаг. Гэвч төрийн байгууллага дээр байгаа зарим мэдээлэл ил тод зарим нь иргэдэд хүрч чадахгүй байна. Нөгөөтэйгүүр, төрийн байгууллагын мэдээллийг байгууллага бүр дээр нь очиж авах нь хүндрэлтэй. Тиймээс төрийн таван байгууллагын олон нийтэд ил болгосон нээлттэй өгөгдлүүдийг нэг системд оруулснаар иргэд хяналтаа чөлөөтэй тавих боломж бүрдэнэ” гэлээ.

www.opendatalab.mn хайлтын системд хөрөнгө, орлогын мэдүүлэг, худалдан авах ажиллагаа, улсын бүртгэл, уул уурхайн лиценз, сонгууль гэсэн категори бүхий 197085 байгууллага, 489494 хувь хүн, 17026 тендер, 73189 албан тушаалтны хөрөнгө орлогын мэдүүлэг, 356 уул уурхайн лиценз, 16 визуал дата болон бүх сонгуулийн мэдээллийг багтаажээ.

Хайлтын системийг ашиглаж, эх сурвалжаар дурдахдаа төрийн байгууллагын анхдагч эх сурвалжтай тулгаж, нягтлах шаардлагатай аж. Учир нь системд мэдээллийг оруулах нь цаг хугацааны хязгаарлалттай тул мэдээллийн өөрчлөлт нь системд ороогүй байх, овог нэрийн давхцал гарах магадлалтай гэдгийг онцолсон юм.

Б.Лхам