Монголбанкны ерөнхийлөгч Н.Баяртсайханыг үүрэгт ажлаас нь чөлөөлөхийг Байнгын хорооны хуралдаанаар дэмжлээ. Тэрбээр ФАТФ-аас Монгол Улсыг “Сааралт жагсаалт”-д оруулсан асуудлаар хариуцлага хүлээж, албан тушаалаа өгөхөөр болсныг ийн хэлэлцэж дэмжсэн юм. Ингэснээр Монголбанкны шинэ удирдлагыг нэр дэвшүүлж, томилох эсэх асуудал МАН дотор марафон өрнүүлж эхэллээ. Ажлаа өгөхөөр болсон Н.Баяртсайханы асуудлыг Байнгын хорооны хуралдаанаар хэлэлцэхээс өмнө нэр бүхий хэд хэдэн хүний нэр уг албан тушаалд яригдаж эхэлсэн юм.
Тэгвэл Н.Баяртсайханыг орлох хүний нэр тодорч эхэлсэн бололтой. Эх сурвалжийн өгч буй мэдээллээр Монголбанкны дараагийн ерөнхийлөгчөөр Засгийн газрын Хэрэг эрхлэх газрын тэргүүн дэд дарга Б.Ганбатыг томилохоор болсон сурагтай. Засгийн газрын Хэрэг эрхлэх газрын тэргүүн дэд дарга Г.Баясгалан Үндсэн хуулийн цэцийн гишүүн болсны дараахан буюу энэ оны зургадугаар сард Б.Ганбатыг түр орлон гүйцэтгэгчээр томилсон байдаг. Б.Ганбат нь энэ албан тушаалд томилогдохоосоо өмнө Төрийн өмчийн бодлого, бодлого зохицуулалтын газрын даргаар ажиллаж байсан юм. Харин энэ удаад Монголбанкны ерөнхийлөгчийн албан тушаалд буурь сэлгэх бололтой.
Б.Ганбатыг Монголбанкны ерөнхийлөгчөөр томилсон тохиолдолд тэрбээр жилийн дотор гурван өөр төрийн өндөр албан тушаал хашсан нэгэн болж байна. Өөрөөр хэлбэл, Төрийн өмчийн бодлого, зохицуулалтын газраас Засгийн газрын Хэрэг эрхлэх газрын тэргүүн дэд дарга болж дэвшсэн нь энэ үйл явдал юм.
Тэрбээр хуульч мэргэжилтэй. Намтар түүхийг нь сөхвөл:
1990-1995 Дорноговь аймаг болон Баянгол дүүргийн Цагдаагийн хэлтэс, төлөөлөгч, мөрдөн байцаагч
1995-1996 Сангийн яамны Тамгын газар, Хуулийн зөвлөх
1996-1998 Сангийн яамны Хуулийн хэлтэс, Хуулийн зөвлөх-мэргэжилтэн
1998-1999 Сангийн яамны Хуулийн хэлтэс, Хуулийн ахлах мэргэжилтэн, Сайдын зөвлөлийн нарийн бичгийн дарга
1999-2000 Сангийн яамны Төрийн захиргааны удирдлага, эрх зүйн газар, Хуулийн ахлах мэргэжилтэн
2000-2001 Санхүү, эдийн засгийн яамны Төрийн захиргааны удирдлагын газар, Хуулийн ахлах мэргэжилтэн
2001-2004 Санхүү, эдийн засгийн яамны Төрийн захиргааны газрын орлогч дарга бөгөөд Хуулийн хэлтсийн дарга, Сайдын зөвлөлийн нарийн бичгийн дарга
2004-2006 Сангийн яамны Төрийн захиргааны газрын орлогч дарга бөгөөд Захиргаа, хуулийн хэлтсийн дарга, Сайдын зөвлөлийн нарийн бичгийн дарга
2006.7-10 сар Сангийн яамны Хууль, эрх зүйн газрын дарга
2008-2009 Сангийн яамны Хууль, эрх зүйн газрын орлогч дарга
2009-2013 Сангийн яамны Хууль, эрх зүйн газрын дарга
2013-2014 Дэлхийн банкны Олон салбарын техник туслалцааны төсөл, эксперт
2013-2016 Монголын Хуульчдын холбоо, өмгөөлөгч
2016.2-8 сар Засгийн газрын Хэрэг эрхлэх газар, Хяналт, шинжилгээ, үнэлгээ, дотоод аудитын газрын дарга
2016-2018 Монгол банк, Хууль, эрх зүйн газрын захирал
2018-2019 Төрийн өмчийн бодлого, зохицуулалтын газрын дарга
2019 оноос ЗГХЭГ-ын Тэргүүн дэд даргаар ажиллаж байгаа юм.
С.Сүлд
Сэтгэгдэл (54)