Авлигатай тэмцэх газраас Монгол Улсын Ерөнхий сайд асан Ч.Сайханбилэг нарыг Оюутолгойн хөрөнгө оруулалтын гэрээг үзэглэхдээ албан тушаалын байдлаа ашиглаж, бусдад давуу эрх олгосон байж болзошгүй гэх үндэслэлээр яллагдагчаар татан шалгаж эхэлсэн билээ. Хэргийн мөрдөн шалгалтын ажиллагаа дуусаж, яллах дүгнэлттэйгээр прокурорт шилжүүлээд буй. Прокуророос хэргийг нэмэлт мөрдөн байцаалт хийлгэх шаардлагатай гэвэл АТГ-т буцаах ёстой. Харин эрүүгийн хэрэг үүсгэх хангалттай нотлох баримт цугларсан гэж үзвэл шүүхэд шилжүүлэх юм. Яг одоогийн байдлаар Ерөнхий сайд асан Ч.Сайханбилэг, С.Баяр, С.Баярцогт нарт холбогдох хэргийг прокурор хянаж буй юм.

Үүнтэй зэрэгцээд Ерөнхий сайд асан Ч.Сайханбилэгийг Монгол Улсын хилээр гарсан гэх мэдээлэл цацагдлаа.

Тодруулбал, дээрх хэргийн мөрдөн шалгалтын хүрээнд Ч.Сайханбилэгийг өнгөрсөн 2018 оны дөрөвдүгээр сард баривчилж, Урьдчилан хорих 461 дүгээр хорих ангид нэг сарын хугацаатай саатуулсан юм. Улмаар цагдан хориог сунгах хүсэлтийг прокурорын байгууллагаас нийслэлийн Чингэлтэй дүүргийн Эрүүгийн хэргийн анхан шатны шүүхээд гаргасан ч түүнд авсан таслан сэргийлэх арга хэмжээг өөрчилж хилийн хориг тавьж, батлан даалтад гаргасан байдаг.

Тэгвэл түүний биеийн байдал муудсан тул гадаадад эмчилгээ хийлгэх шаардлагатай болсон аж.

Тиймээс энэ оны аравдугаар сард  өмгөөлөгчөөрөө дамжуулан хилийн хоригийг цуцлах хүсэлтийг дээрх шүүхэд гаргажээ. Шүүхээс түүний эрүүл мэндийн байдлыг харгалзан үзэж, хүндэтгэн үзэх шалтгааны улмаас хилийн хоригийг цуцлах шийдвэр гаргасан аж. Үүний дараа Ч.Сайханбилэг Солонгос улсыг зорьсон гэдгийг эх сурвалж дурдав.

Хэдийгээр түүнийг улсын хилээр гарахыг хориглосон шүүхийн шийдвэр цуцлагдсан ч гэлээ холбогдох эрүүгийн хэрэг нь прокурорт хянагдаж буй энэ цаг үед ийнхүү улсын хилээр гарсан нь цаанаа ямар нэг санаа зорилго бий юм биш гэж асуухад хүргээд байна. Тиймээс зугтах гэж гарсан уу, эсвэл үнэхээр эмчилгээ хийлгэхээр явсан уу гэдэг нь тун удахгүй тодорхой болох биз ээ

Г.Алимаа