Агаарын бохирдлыг бууруулах зорилгоор “сайжруулсан” гэх тодотголтой шахмал түлш хэрэглээнд нэвтрээд хагас жилийн нүүр үзжээ. “Халж байна”, “Халаахгүй байна”, “Утаагүй, давгүй юм” гэх сэтгэгдэл цахим сүлжээнд хөвөрнө.
Иргэдийн сэтгэгдлээс харахад шүүмжлэлээс илүү талархсан сэтгэгдэл буюу тухайлбал, өвлийн эхэн сартай залгасан ч агаарын бохирдол харьцангуй бага байгаа талаарх сэтгэгдэл их байна.
Арга ч үгүй. Өвлийн турш үр хүүхэд нь эмнэлгийн үүд сахиж, эцэг эхчүүд нь “Боож үхлээ” хэмээн жагсаж байсан цаг саяхан. Агаарын бохирдлыг бууруулах уриан дор хэдэн ч тэрбум төгрөгийг салхинд үрэв. Төсөөлөхөөс ч аймаар. Цэвэр агаар сангаас өнгөрсөн онд хийсэн мэдээллээр 2008-2016 онд агаарын бохирдлыг бууруулахад 164.1 тэрбум төгрөг зарцуусан бол гадаадын 104.7 сая ам.долларын зээл, 48.6 сая ам.долларын буцалтгүй тусламжийг ашигласан ч агаарын бохирдол буураагүй гэсэн дүгнэлт гаргасан юм.
Тиймээс У.Хүрэлсүхийн Засгийн газрын эл шийдвэрт хоёр гараа дээш өргөх дэмжигчид олон харагдана лээ. Аливаа эрсдэлийг үүрээд ч хамаагүй тухайлбал, утаа мэдрэгчийг айл өрх бүрт суурилуулах зэрэг хийсэн ажлынхаа эцсийг үзэхээр зориг шулуудсан нь магад таалагдаа биз ээ.
Үүнийг нь үргүй зардал хэмээн буруутгах иргэд олон ч түүхий нүүрсийг хэрэглээнд нэвтрүүлж болохгүй гэдэг байр суурь дээр бат зогсжээ. Шахмалд түлш нийтээр хэрэглэж эхлээд удаагүй ч иргэдэд түүхий нүүрс түлж болохгүй гэдэг ухагдахуун суусан нь авууштай.
Харин “Тавантолгой түлш” ХХК-иас сайжруулан түлшийг савлах хүн хүч ихээхэн дутмаг байгаа талаар хэлж байна. Энэ хүрээнд иргэдийг нэг шуудай түлш савлахад 300 төгрөгөөр тооцон ажиллуулдаг бөгөөд уг ажилд нээлттэй хорих ангид ял эдэлж буй хоригдлуудыг татан оролцуулж байгаа ажээ. Тухайлбал, Амгалангийн нээлттэй хорих ангид гэхэд 80 хүн уг ажилд оролцож байна. Эх сурвалжийн мэдээлж буйгаар хоригдлуудыг ажлын таван өдрөөр ажиллуулж, цалинжуулдаг гэв. Шахмал түлшийг иргэдийн гарт хүргэх, түүхий нүүрс түлүүлэхгүй байхын тулд төр засгаас ийм арга хэмжээг авч байна. Харин уг ажилд хяналт шалгалт хийдэг төрийн байгууллагдуудын зүгээс шахмал түлшний килограмм хэмжээндээ хүрч буй эсэхэд шалгалт хийж, иргэдийн эргэлзээг арилгах хэрэгтэй биз ээ.
Б.Лхам
