Хууль зүй, дотоод хэргийн сайд Ц.Нямдорж Монгол Улс “Саарал жагсаалт”-д орсон асуудлаар байр сууриа илэрхийллээ. УИХ дахь АН-ын зөвлөл болон Т.Аюурсайхан тэргүүтэй гишүүдийн зүгээс уг асуудлын хүрээнд зөвхөн Монголбанкны ерөнхийлөгч, Санхүүгийн зохицуулах хорооны дарга нарт хариуцлага хүлээлгээд өнгөрөх ёсгүй гэдгийг хэлж байгаа юм.
Тэрбээр “Их сонин үзэгдэл боллоо. Ази, номхон далайн бүсээс маш сайн ажилласан, их ажил хийсэн гэж надад аравдугаар сард талархлын захидал ирүүлсэн. Захидалдаа танай улс эрчимжсэн хяналтын зэрэглэлд байсныг зөөлрүүлж, ердийн хяналтын зэрэглэлд шилжүүллээ, баяр хүргэе гэсэн байсан. Зэрэглэл бууруулсан учраас гайгүй гэж байтал Парист шийдвэр гарсан. Үүний шалтгааныг сайн шалгах хэрэгтэй. Монголбанкны ерөнхийлөгч ярих зүйлийнхээ 10-хан хувийг ярьж байна гэлээ. Ажил хариуцаж байгаа хүнд ярих зүйл байна. Үүнийг сонсох хэрэгтэй.
“Саарал жагсаалт” бол мөнгө төгрөг, хууль хяналтын байгууллагын асуудал биш. Энэ улс гадаадын хөрөнгө оруулалт, дотоодын бизнестээ хэр зөв хандаж байгаагийн хариулт. Сонгож авсан замдаа үнэнч байж чаддаггүй гэж Монгол Улсад өгч байгаа сануулга. Энэ ердийн зүйл биш. Тиймээс Монголбанкны ерөнхийлөгч, СЗХ-ын даргын үгийг сонсох хэрэгтэй” гэсэн юм.
Мөн БНСУ-д саатуулагдан шалгуулж байгаа Цэцийн дарга Д.Одбаярын асуудалд "Монголчууд хүнлэг хандах хэрэгтэй. Тэр хүний зөв ч бай, буруу ч бай Гадаад харилцааны яам хамгаалах ёстой. Аливаа улсын хил бүрэн эрхт тусгаар тогтнолын баталгаа ганцхан хууль байдаг. Тэр бол Байцаан шийтгэх хууль. Тэр хууль дээр Монгол Улсын хилийг заагаад өгчихсөн байдаг. Монголын хуулийн байгууллагууд зөвхөн монголын нутаг дэвсгэр дээр үйл ажиллагаа явуулна. Манай хуулийн байгууллага бусдын нутагт үйл ажиллагаа явуулж огт болдоггүй. 2003 онд гадаадаас иргэнээ авчирсан нь тухайн улсын тусгай албатай хамтарч хийсэн ажил. Тэдний нутаг дэвсгэр учраас айлын тал асуудлаа шийднэ. Биднээс асуухгүйгээр шийднэ. Ямар ч тохиолдолд Элчин сайдын яам энэ асуудалд анхаарлаа хандуулж ажиллах ёстой. Буруутай, буруугүй эсэх нь хоёрдугаар асуудал. Гол нь Монгол Улсын иргэнийхээ төлөө Элчин сайдын яам ажиллах ёстой. Хүн хөнөөсөн байсан ч иргэнийхээ араас явах ёстой. Ажиллаж л байгаа. Энэ асуудлыг жаахан дэвэргэлгүй шийдвэр гарах хүртэл хүлээцтэй хандаж, Монгол хүн гэдэг талаас нь хараасай гэж бодож байна. Д.Одбаяр дарга шалгуулж байгаа юм билээ" гэдгийг хэллээ.
С.Сүлд
Сэтгэгдэл (66)