Энэ долоо хоногт болж өнгөрсөн онцлох үйл явдлыг хүргэж байна.
Өнгөрсөн долоо хоногт Үндсэн хуулийн цэцийн дарга Д.Одбаяр болон түүнийг дагалдан явсан А нар бусдад бэлгийн дарамт үзүүлсэн гэх хэргээр БНСУ-ын Инчеоны нисэх буудалд саатуулагдсан асудал гарсан. Үүнтэй зэрэгцэн УИХ-ын гишүүн М, Х нар мөрийтэй тоглосон гэх хэргийн талаар олон нийтийн сүлжээгээр цацагдаж эхлэв. Эл явдлаас хойш мөрийтэй тоглосон УИХ-ын гишүүн М, Х нарын эрэлд гарсан гэхэд болно.
Үүссэн нөхцөл байдалтай холбогдуулан зарим гишүүд “би тоглоогүй” хэмээн байр сууриа илэрхийлж эхэлсэн ч тэдгээр гишүүд хэн гэдэг нь тодорхой бус байна. Харин Засгийн газрын ээлжит хуралдаанаар Гаалийн ерөнхий газрын дэд дарга болон МИАТ-ийн Сөүл дэх төлөөлөгчийн газрын ажилтан нар мөрийтэй тоглосон талаар мэдээлэв. Учир нь төрийн албан хаагчид гадаадад зорчихдоо мөрийтэй тоглоом тоглох, энэ тарлийн үйл ажиллагаа явуулдаг газраар үйлчлүүлэхийг хориглосон байдаг учраас дээрх нэр бүхий албан тушаалтнуудыг албан тушаалаас нь чөлөөлж, холбогдох газар хэргийг шилжүүлсэн юм.
Удирдах албан тушаал хашиж буй төрийн албан хаагчдын дур зоргоор аашилсан, мөрийтэй тоглосон гэх асуудлыг илрүүлэж, хариуцлага тооцсон нь сайшаалтай ч оньсого мэт үлдсэн УИХ-ын гишүүдийг зарлахгүй байгаад иргэд гайхаж байна. Ер нь УИХ-ын гишүүд өрөөндөө архидан согтуурдаг, мөрийтэй тоглодог гэх асуудал их яригддаг. Хэрэв дээрх гишүүдийг олоод хариуцлага хүлээлгэчихвэл Монгол Улс хариуцлага тооцож чаддаг, хуулиа дээдэлдэг ард түмэн гэж харагдана. Ингэж харагдах нь л чухал. Ядаж л Монгол Улс дэлхийд унаад байгаа нэр хүндээ сэргээхэд чухал биш гэж үү УИХ-ын дарга аа.
Ямартай ч нисэх онгоцны үйлчлэгчийн өгзөгөнд хүрч, бэлгийн дарамт учруулсан хэргээр байцаагдаж, 10 хоногийн хилийн хориг авсан Д.Одбаяр торгууль төлж нутаг буцах талаар яригдаж байна. Тэрбээр мэдүүлэгтээ тухайн үед согтууруулах ундааны зүйл хэрэглэсэн байсан бөгөөд юу болсныг санахгүй байна хэмээн мэдүүлжээ. Ингээд түүнийг өмнө нь гэмт хэрэг үйлдэж байгаагүйг харгалзан үзэж, торгуулийн төлбөр байршуулснаар энэ сарын 15-ны өдрийг хүртэл тавигдсан хоригийг цуцалж магадгүй байна. Тухайлбал, БНСУ-д Хүчирхийллийн эсрэг хууль зөрчсөн этгээдийг 10 хүртэлх хорих ял болон 15 сая хүртэлх воноор торгох, Агаарын аюулгүй байдлын тухай хуулийг зөрчсөн этгээдийг 10 хүртэлх сая воноор торгох зохицуулалттай байдаг аж.
Дэлхийн улсууд иргэнээ ингэж хамгаалж байхад манай улс төрийн албаны ёс зүй, хариуцлагын асуудлыг дөнгөж л Үндсэн хуулийн нэмэлт, өөрчлөлтөд оруулахаар бэлдэж байгаа нь харамсалтай.
Б.Лхам
Сэтгэгдэл (7)