УИХ дахь МАН-ын бүлгийн ээлжит хуралдаанаар Үндсэн хуулийн нэмэлт, өөрчлөлтийн төслийг хэлэлцсэн байна. Ингэхдээ АН-аас тавьсан гурван саналыг нэг бүрчлэн хэлэлцсэн тухай Бүлгийн дарга Д.Тогтохсүрэн хэллээ.

Түүний хэлснээр Ерөнхий сайд танхимаа өөрөө бүрдүүлдэг байх, Засгийн газрын гишүүдээ томилох, чөлөөлөх, огцруулах асуудлыг өөрөө шийдвэрлэнэ гэсэн заалтыг гишүүд дэмжжээ. Мөн сонгуулийн холимог тогтолцоотой болгох саналыг дэмжсэн байна. Гэхдээ холимог тогтолцоог 2024 оноос хэрэгжүүлэхээр санал нэгдсан байна.

Харин Ерөнхийлөгчийг парламентаас сонгох саналд эцсийн шийдвэр гараагүй аж. Улмаар Зөвшилцлийн ажлын хэсэг дээр дахин ярих нь зүйтэй гэж үзсэн байна.

Бүлгийн дарга Д.Тогтохсүрэн "Үндсэн хуульд нэмэлт, өөрчлөлт оруулах тухай асуудлыг 2019 оны 6 дугаар сарын 12-ноос хойш ярьж буй бөгөөд УИХ-аас 10 сард гуравдугаар хэлэлцүүлэгт оруулахаар болсон. МАН-ын бүлгээс энэ долоо хоногт гуравдугаар хэлэлцүүлгийг явуулж дуусгах, гуравдугаар хэлэлцүүлгээр Үндсэн хуулийн нэмэлтийг батлахаар 100 хувийн саналаар тогтсон" гэсэн юм.

Хурлын дараа тэрбээр сэтгүүлчдийн асуултад хариуллаа.

-Өнгөрсөн долоо хоногт АН-ын дарга С.Эрдэнэ мэдэгдэхдээ сонгуулийг 2020 онд холимог тогтолцоогоор явуулах хэрэгтэй. 2024 он гэвэл зөвшилцөхгүй гэж мэдэгдсэн. Олонхын бүлэг ингээд шийдвэрлэчихээр яах бол?

-Ажлын хэсэг дээр 2024 онд явуулахаар хэлэлцсэн. Иймээс үүгээрээ явуулахаар тогтож байгаа. Ерөнхийлөгчийг парламентаас сонгох тухай асуудлыг 2025 оноос гэж ярьж байна. Зөвшилцлийн ажлын хэсгийн хэлэлцэж байгаа асуудлыг бүлэгт танилцуулан хэлэлцүүлж байгаа.

-АН гуравдугаар хэлэлцүүлэгт оролцохгүй гэвэл МАН дангаараа шийдээд явах боломж байгаа юу?

-АН оролцохгүй гэвэл МАН дангаараа хэлэлцээд явах байдалд орно. Бид АН-ын саналаар явж ирсэн. АН анх ард нийтийн санал асуулга шиг хэрэгтэй юм алга гэсэн. Бид ард нийтийн санал асуулга явуулах шийдвэр гаргатал үүн шиг хэрэггүй зүйл байхгүй гэсэн. Ингээд гуравдугаар хэлэлцүүлэгт орсон. АН-аас дээрх гурван асуудлаар зөвшилцмөөр байна гэж санал оруулсан. Бид Үндсэн хуулийг бүх талаас нь хэлэлцэх нь зөв гэж үзээд бүх нам, тэр дундаа парламентад байгаа намыг оролцуулсан ойлголцол, зөвшилцлийн баримт бичиг байх ёстой гэдэг үүднээс нь хүлээцтэй хандаж, саналыг тусгахыг хичээж байна.

-Холигмог тогтолцоонд шилжсэн тохиолдолд санал өгөх хувилбарыг ямар байхаар тогтсон бэ?

-Хэрэгжих хугацаа 2020 оны тавдугаар сар гэж байгаа заалтыг өөрчлөхгүй. Зарим заалтын хэрэгжих хугацаа өөр байгаа. Жишээлбэл, холимог тогтолцоо 2024 он, Ерөнхийлөгчийн сонгууль бол хуульд тусгаснаараа явна.

С.Сүлд