Түүнд дарга нар шиг эрх мэдэл байхгүй. Бийлэгжүү загнах мөнгө үгүй. Төрийн албанд танил талгүй, том даргын албан тушаалын хүрээнд бусдад нөлөөлөх “бяр” хомс, бүр байхгүй. Хөгжлийн бэрхшээлтэй гэсэн нэр томъёо, тодотгол нь түүнийг “заагладаг” болохоос тэдний адил төрийн албан хаагч. Жирийн Монгол эмэгтэй, бяцхан үрийн ээж. Харамсалтай бас хачирхалтай гэмээр хэргийн уршгаар элэг бүтэн амьдрах хувь дутсан нь өнөөдрийг хүртэл түүнийг амьдралд сөхрөх биш сөрж зогсох хатуу гэмээр үнэнтэй нүүр тулахаас өөр сонголтгүй үлдээсэн юм.

Тэр шантааргүй, шантарахыг ч хүсээгүй. Эр нөхрөө алдсан эхнэр хүний сэтгэлийн хат, эцгээ нэхэж уйлагнах охиныхоо элгийг дэвтээх гэж энэ бүхэнтэй тэмцэж, Төв талбайд суулт зарласан нь саяхан.

Балчир охиноо гэрт нь үлдээгээд нөхрийнхөө учир битүүлэг хэргийн үнэн мөнийг тогтоолгохоор түшээдийн залардаг Төрийн ордны ур дахь Төв талбайд 12 хоног суув. Энэ хооронд юу болж өнгөрөв.

“Эх орон дуудаж байна” нэртэй Үндэсний фронт гэх хөдөлгөөнийхөн хоёр хоногийн турш саарал ордонг тойрон гороолов. Төрийн ордонд суугаа түшээдийн толгойг “тасдах”-аас наагуур юм болж байж тарсан хөдөлгөөнийхөнд бэлэвсэрч хоцорсон бүсгүйн тэмцэл огт хамаагүй байсан нь мэдээж. Түүн дээр хэн ч гарч ирж уулзсангүй. “Шударга тав” хэмээх тодотголтой болтлоо олон нийтэд алдаршсан өнөөх таван гишүүний нэгэн ч зорин ирсэнгүй. Төрийн түшээ, сайд, даргын биш эх хүнийхээ хувиар эмэгтэй гишүүдийг энэ асуудалд анхаарлаа хандуулна гэж найдтал тэгсэнгүй. Тийм зүйл ч болсонгүй, түүнтэй холбоотой ганц ч үг ганхийлгэсэнгүй.

12 хоногийн турш суулт хийхэд ээжээс нь өөр хань болох хүн түүнд байсангүй. “Миний охины сэтгэлийн шарх анигдана гэвэл, нүдний чинь цог нэмэгдэнэ гэвэл, өөрийгөө буруутгах зэмлэл чинь багасна гэвэл хамаа алга ээж нь охиныгоо дэмжье” хэмээгээд аньсгандаа нулимстай 12 хоногийн турш хамт суулт хийв. Үхтэл үр харам гэж энэ. Тэр өөрөө ч бяцхан үрийн ээж. Ханийнхаа учир битүүлгээр амиа алдсан шалтгааны учиг зангилааг үнэн зөвөөр шийдүүлэх гэж аавгүй хоцорсон нялх үрээ үлдээгээд, УИХ-ын гишүүд, сайд, дарга нар өдөр бүр, өглөө, оройдоо хажуугаар явж өнгөрдөг Сүхбаатарын талбайд суулт хийсэн юм.

Магадгүй зарим нь түүнийг хаа нэгтээгээс хар тентэй машин дотроосоо хараад өнгөрсөн л байх.

Эцэстээ Ерөнхий сайд У.Хүрэлсүх, Цагдаагийн ерөнхий газрын дарга С.Баатаржав тэргүүтэй хүмүүс түүнтэй уулзаж, хүсэлтийг нь хүлээж авснаар тэрбээр суултаа зогсоож, өлсгөлөн зарлахаа болив. Ингэхдээ ажил үүргээ гүйцэтгэж яваад харамсалтайгаар амь насаа алдсан нөхрийнх нь хэргийг хуулийн хүрээнд нэн даруй шийдвэрлэхийг Хууль зүй, дотоод хэргийн сайд Ц.Нямдорж болон Цагдаагийн ерөнхий газрын С.Баатаржав даргад үүрэг болгов. Бүхэл бүтэн Засгийн газрын тэргүүн, Ерөнхий сайд нь өөрийн биеэр ирж, холбогдох албаныханд үүрэг өгсөн болохоор уг хэрэгт дахин мөрдөн шалгах ажиллагаа явуулж, үнэн мөнийг нь тогтооно гэсэн итгэл тээсээр гэртээ, охин дээрээ очсон болов уу.

Эндээс ганцхан юм харагдаж байна. Тэр хуулийн салбар, мэргэжлийн хяналтын байгууллага, шүүх эмнэлгийн ялзралын эсрэг ганцаараа зогссон ч эцсийн дүндээ эхний зорилгоо биелүүллээ. Төрийн өндөр албан тушаалтан, том дарга нарын чихийг онгойлгож, асуудлаа шийдвэрлүүлэхээр болсон нь өөрөө ялалт. Хүчтэйд нь үйлчилж, хүчгүйг нь үгүйсгэдэг өнөөгийн нийгмийн ужгирсан тогтолцооны эсрэг тэмцэх нь баргийн хүн байтугай улстөрч, сайдын барах ажил биш. Харин ганцаараа тэр чадлаа. Энэ нь хууль хяналтын байгууллагын өмнө очоод хүчин мөхөстдөг олон хүнд итгэл өглөө. Тиймээс Баярлалаа, Болороо. Ардаа ямар нэгэн дэмжиж туслах томоохон албан тушаалтан, эрх мэдэлтэн үгүй ч "Ээжээ, би аавыгаа бүтнээр нь санаад байна" хэмээх үрийн Тань сайн сайхны төлөө залбирах, үнэний төлөө тэмцэх олон мянган иргэн байгаа гэдгийг энд тодотгох хэрэгтэй. 

С.Гандөл