Зэвсэгт хүчний Жанжин штабын даргаар томилогдсон хошууч генерал тушаал гаргаж зарим удирдах албаны томилгоо хийжээ. Тодруулбал, Зэсвэгт хүчний Бүтээн байгуулалтын дэмжлэгийн газрын даргаар Д.Жаргалсайханыг томилсон байна. Д.Жаргалсайхан нь Баянхонгор аймгийн Засаг даргаар ажиллаж байсан нэгэн. Тэрбээр Засаг даргын албаа өгсний дараа Ерөнхийлөгчийн Тамгын газрын даргаар З.Энхболд очиход Тамгын газрын Бодлого, үйл ажиллагааны хэлтсийн даргааар томилогдсон байдаг.

Түүнийг Төрийн соёрхолт, гавьяат жүжигчин Д.Сосорбарамын дүү гэдгээр нь хүмүүс эчнээ танина. Үүнээс гадна Жанжин штабын даргын тушаалаар Ажиллагааны удирдлагын газрын даргаар хурандаа С.Дашзэвэгийн томилсон байна.

Энэ албыг өмнө нь хошууч генерал Д.Ганзориг өөрөө хашиж байсан юм. Зарим хэвлэлд бичсэнээр Баянхонгорын уугуул хурандааг энэ албанд томилсныг шүүмжлэх хүн олон байгаа гэнэ. Мөн Хуурай замын цэргийн командлалын штабын даргаар бригадын генерал Л.Онцгойбаярыг томилсон байна.

Ийнхүү хошууч генерал А.Ганбатын халааг авсан Д.Ганзориг үүрэгт ажлаа хүлээн авснаас хойшхи халаа, сэлгээгээ хийж эхэллээ. Тэрбээр Баянхонгорын угшилтай хоёр ч хүнийг Жанжин штабын чухал албанд ийн томилжээ.

Сонирхолтой нь, аймгийн Засаг дарга, Ерөнхийлөгчийн Тамгын газарт ажиллаж байсан Д.Жаргалсайханаар Бүтээн байгуулалтын дэмжлэгийн газрыг удирдуулахаар болсныг Ерөнхийлөгч Х.Баттулгатай холбон тайлбарлах хүн олон байгаа юм.

Учир нь, Тавантолгой-Зүүнбаян чиглэлийн 414 км төмөр замын бүтээн байгуулалтын ажлыг Жанжин штаб тэр дундаа Бүтээн байгуулалтын дэмжлэгийн газар хариуцан ажиллаж буй. Нэг үгээр Тавантолгой-Зүүнбаян чиглэлийн төмөр замын томоохон бүтээн байгуулалтыг Д.Сосорбарам гавьяатын дүү Д.Жаргалсайхан нугалахаар болж байна.

Сонирхуулахад Ерөнхийлөгч Х.Баттулга Өмнөговь аймагт ажиллаж, төмөр замын бүтээн байгуулалттай танилцах үеэрээ Жанжин штабын дарга Д.Ганзоригт хошууч генерал цолыг нь гардуулан өгсөн билээ.

С.Сүлд