Монгол Улс дэлхийн хамгийн бохирдолтой 10 хотын жагсаалтаас хасагдсан сайхан мэдээтэй долоо хоног биднийг угтлаа. Тодруулбал, дэлхий даяарх агаарын чанарын дата мэдээллийн нэгдсэн бааз бүрдүүлэгч “Greenpeace” болон “AirVisual” олон улсын байгууллагаас манай улсын нийслэл Улаанбаатар дэлхийн агаарын бохирдолтой 10 орны тооноос гарсан талаар өнгөрсөн мягмар гарагт мэдээллээ.
Дэлхийн агаарын бохирдолтой хотуудын жагсаалтад Монгол Улсыг зургадугаарт жагсаж буйг мэдээлж байсан нь өнгөрсөн жилийн үйл явдал. “Greenpeace” болон “AirVisual” байгууллагын гаргасан судалгаагаар дэлхийн хамгийн их бохирдолтой хотуудын тоог Энэтхэг улсын Нью-Дели хот тэргүүлж, Пакистан, Бангладеш, Узбекистан, Вьетнам, Индонез зэрэг улс багтаж байна. Харин жилийн дундаж агаарын чанарын үзүүлэлтээр Улаанбаатар хот 64 дүгээр байрт, хамгийн их агаарын бохирдолтой хотуудын 72 дугаарт бичигдэж байна.
Манай улсын хувьд агаарын бохирдлын 80 орчим хувийг гэр хороолол, 10 орчим хувийг автомашин, зургаан хувийг цахилгаан станц, дөрвөн хувийг хөрсний бохирдол үүсгэдэг гэж буй. Энэ үзүүлэлт буурч эерэг үр дүн гарч байгааг дээрх судалгаа харуулж байна.
Засгийн газрын тогтоолоор өнгөрсөн тавдугаар сараас түүхий нүүрсний хэрэглээг хориглож, есдүгээр сараас шахмал түлшийг хэрэглээнд нэвтрүүлж эхэлсэн. Энэ хугацаанд шахмал түлш сайн байна гэх хэсэг байхад эргэлзэж буй бүлэг гарч, тэр хэрэээрээ нийгэм бүхэлдээ хоёр хуваагдсан. Учир нь угаарын хийнд хордож амиа алдсан харамсалтай хэрэг нэг бус удаа гарсан. Үүнтэй холбогдуулан мэргэжлийн байгууллагынхан 24 цагаар жижүүрлэн ажиллаж, тусламж үйлчилгээ үзүүлж, зуухныхаа ан цавыг битүүлэх зэрэг зөвлөмж хүргүүлж, хэрхэн галлагаа хийх талаар өрх бүрийн хаалгыг тогшиж, тухай бүрт нь мэдээлэл хүргэсний эцэст дуудлага өгөх иргэдийн тоо буурсан талаар онцолж байгаа.
Өөрөөр хэлбэл, иргэд саваа бэлдээгүй байж саалиа бэлдэх гэж яарсантай холбоотой гэдгийг харуулж буй юм.
Өнөөдрийн хувьд PM10 тоосонцор дээд хэмжээ 114 байхаас 57, нүүрстөрөгчийн дутуу исэл 25 байхаас 19, хүхрийн давхар исэл 40 байхаас 26 байна.
Ямартай ч шахмал түлшийг хэрэглэсэн хагас жилийн үр дүн гарчээ. Шүүмжилж суусан иргэд хүртэл агаарын бохирдлыг өмнөх оны мөн үетэй харьцуулж суугаа харагдана лээ. Хамгийн гол нь дэлхийн хамгийн их бохирдолтой хотуудын “топ 10”-ын нэгээс хасагдсан нь томоохон дэвшил биш гэж үү.
Б.Лхам
Сэтгэгдэл (6)